Aqtóbe oblysynda kólik órtenip, bir otbasynyń eki balasy qaza tapty. Bul týraly "Astana" telearnasy habarlady.

Telearna málimetinshe, oqıǵa Áıteke bı aýdanynda bolǵan. Aǵaıyndylar aýlada buzylyp turǵan kólik ishinde oınaǵan. Kenetten eski kólik otqa oranyp, 3 jasar bala tirideı janyp ketken. Onyń 7 jastaǵy aǵasy órtengen kólikten shyqqanymen, 4-dárejedegi kúıik alyp, jedel aýrýhanaǵa jetkizilgen. Aýdandyq aýrýhananyń dárigerleri men Aqtóbeden kelgen mamandar búldirshinniń ómiri úshin kúreskenmen, qutqaryp qala almady.

Aqtóbe oblysy densaýlyq saqtaý basqarmasynyń málimetinshe, balanyń denesin 80 paıyzǵa deıin kúıik shalýyna baılanysty óte aýyr jaǵdaıda Áıteke bı aýdandyq aýrýhanaǵa jetkizilgen. Jansaqtaý bóliminde reanımasıalyq kómek kórsetilgen.

– Qaladan medısınalyq avıasıadan quramynda reanımatolog-anestezolog jáne kombýstıolog, travmatolog dárigerler keldi. Barlyq qajetti medısınalyq kómek kórsetildi. Ókinishke qaraı, emniń nátıjesi bolmaı, bala qaıtys boldy, – dedi oblystyq densaýlyq saqtaý basqarmasy basshysynyń orynbasary Aıgúl Qushtaeva. 

Órttiń shyǵý sebepterin mamandar anyqtaýda. Jalpy jyl basynan beri aımaqta 160-tan astam órt bolyp, saldarynan 5 adam qaza bolǵan.