«Nur Otan»-nyń baspasóz qyzmeti «Halyq únine qulaq asatyn memleket» tujyrymdamasyn iske asyrý aıasynda partıanyń azamattar aldynda bergen ýádelerin oryndaý boıynsha naqty atqarylǵan istermen bólisýdi jalǵastyrýda.

Byltyr aqpan aıynda «Nur Otan» partıasy Tóraǵasynyń birinshi orynbasary Baýyrjan Baıbek Túrkistan oblysyna jumys sapary barysynda Otyrar aýdany Sháýildir aýylynyń turǵyndarymen kezdesken-di. Kezdesýde 300-den astam otbasy 70-80 jyldary salynǵan úılerde ınjenerlik ınfraqurylymnyń tozýyna baılanysty ortalyq jylýdyń joqtyǵyna shaǵymdanyp edi.

«Elbasynyń bastamasymen qolǵa alynǵan «Aýyl – El besigi» jobasynyń aıasynda búginde elimizdiń shalǵaı aýdandarynyń túıitkildi máselelerin sheshý boıynsha partıa júıeli sharalar ázirleýde. Oblys ákiminiń aıtýynsha, jaqyn arada búdjetti naqtylaý kezinde jylý júıelerin salý úshin 700 mln. teńgeden astam qarjy bólinedi. Qazandyqtyń qurylysyna qarajat bólingen. Aýyl turǵyndary kótergen máseleni sheshý «Nur Otan» partıasynyń baqylaýyna alyndy», – dep atap ótken edi sol kezde Baýyrjan Baıbek.

Partıalyq baqylaý qorytyndysy boıynsha búginde Sháýildir aýylynda jylý júıelerin qaıta jańartý jumystary men qýaty 10450 kVt qazandyq qurylysy aıaqtaldy. Endi 25 kóppáterli turǵyn úı, 45 búdjettik jáne 25 kásipkerlik nysan ortalyqtandyrylǵan jylý júıesine qosyldy.
Sondaı-aq, munda jalpy uzyndyǵy 650 m bolatyn 2 kóshege orta jóndeý, uzyndyǵy 870 m bolatyn 1 kóshege aǵymdaǵy jóndeý jumystary júrgizilip, paıdalanýǵa berildi.

Eske sala keteıik, buǵan deıin partıanyń baspasóz qyzmeti turǵyndardyń «Nur Otan»-ǵa ótinishinen keıin Shymkenttegi tutas bir shaǵyn aýdannyń ómiri qalaı ózgergeni týraly aıtqan bolatyn. Azat shaǵyn aýdanynda 4 jyldan astam ýaqyttan beri elektr, gaz jáne sýmen qamtamasyz etý máseleleri sheshilmeı kelgen edi.

«Partıa Lıderi Nursultan Nazarbaev azamattardyń máselelerin sheshý, problemalar týraly ashyq aıtý jáne olardy jergilikti jerlerde sheshýge qol jetkizý boıynsha «Nur Otan» partıasynyń jumysyn jandandyrýdy tapsyrdy. Kóbinese aımaqtardyń tez ósýine baılanysty olarǵa laıyqty ınfraqurylym jasalyp úlgermeıdi. Degenmen, Memleket basshysy Qasym-Jomart Toqaevtyń ártúrli aýdandar turǵyndary arasyndaǵy teńsizdikti joıý týraly tapsyrmasy bar», - degen Baýyrjan Baıbek turǵyndarǵa máseleni partıalyq baqylaýda ustaýǵa ýáde bergen bolatyn.
Nátıjesinde, búginde shaǵyn aýdanda barlyq elektr jelileri júrgizildi. Uzyndyǵy 8,7 km ortalyq sý qubyry jelileriniń jáne 10 km gaz qubyrynyń qurylysy aıaqtaldy. İshki joldarǵa asfált tóseý jumystary júrgizilýde.

Maýsym aıynyń sońyna deıin abonentterdi ortalyq sý qubyryna qosýdy jáne aýyz sý berýdi qamtamasyz etý, 1 tamyzǵa deıin avtomatty gaz taratý stansıasynyń qurylysyn aıaqtap, gaz berý, al 1 qyrkúıekke deıin ishki joldardyń asfált jabynynyń ekinshi qabatyn salý josparlanýda.