Almatyda mýtasıalanǵan "delta" shtamynyń bary belgili boldy. Bul týraly qalanyń bas sanıtar dárigeri Jandarbek Bekshın málimdedi. 

– Keshe 22 maýsym kúni "delta" shtamynyń bolý múmkindigi anyqtaldy. Biz ony búgin taǵy bir ret rastadyq. Mýtasıalanǵan "delta" shtamynyń shynymen de aınalymda bar ekeni belgili boldy, – dedi ol. 

Bekshınnyń sózinshe, atalǵan shtamdy 1984 jylǵy K esimdi azamatsha juqtyrǵan. Ol úı sharýasyndaǵy kelinshek, esh jerde jumys istemeıdi. Onyń kúıeýi shetelde issaparda júr. Onyń joldasy aqpan aıynda koronavırýspen aýyrǵan. Al naýqastyń ózi qazir aýrýhanada jatyr. Onymen baılanys jasaǵan jeti adam oqshaýlandy. Qazir epıdemıologıalyq tekserý júrgizilýde.

– Ázirge onyń bul shtamdy naqty qaı jerde juqtyrǵany belgisiz. Ol kisi birneshe nysanda bolǵan. Ol jerler baqylaýǵa alyndy, – dedi Jandarbek Bekshın.

Buǵan deıin koronavırýstyń "Delta" shtammyna tán mýtasıanyń yqtımaldyǵy anyqtalǵany habarlanǵan. Densaýlyq saqtaý mınıstri Alekseı Soıdyń aıtýynsha, "úndi" shtammy ózge shtammdarǵa qaraǵanda tez juǵady jáne ınkýbasıalyq kezeńi qysqa, 7 kúnge deıin sozylady.

Premer-mınıstr orynbasary Eraly Toǵjanov jańa shtamm anyqtalýyna baılanysty karantın sharalary kúsheıtiletinin málim etti.

Ol barlyq ákimder adamdar kóptep jınalatyn oryndarda, ásirese demalys oryndarynda sanıtarlyq talaptardyń, áleýmettik qashyqtyqtyń, maska rejıminiń qatań saqtalýyna basa nazar aýdarýǵa tıis ekenin aıtyp, halyqty vaksınalaý qarqynyn ulǵaıtý qajettigine nazar aýdarǵan.