Nur-Sultan ákimi Altaı Kólginov jańadan vaksına saldyrǵandar arasynda eki bólmeli páter utysqa tigiletinin aıtty. Bul týraly ol Instagram paraqshasynda habarlady.

– Ujymdyq ımýnıtetti qalyptastyrý úshin qala halqynyń 60%-ten astamy vaksınalanýy qajet. Sanıtar dárigerler qosymsha karantındik shekteýler týraly jańa qaýly daıyndap jatyr: qaýip-qater toby úshin vaksınalaý mindetti, vaksınalanbaǵan qyzmetkerlerdi qashyqtan jumys isteý rejımine kóshirý talap etiledi, – dedi ákim.

Kólginov qala turǵyndaryn vaksınasıaǵa yntalandyrý úshin baǵaly syılyqtar oınatylatynyn atap ótti.

– Jańadan vaksınalanǵandar arasynda eki bólmeli páter oınatylady (ınvestorlar esebinen). Utys oıynyna qala emhanalarynda nemese SOO/SÚ pýnktterinde ekpe alǵan qala turǵyndarynyń bári qatysa alady.

Al páter utys oıynyna osy jyldyń 25 maýsymy men 31 tamyzy aralyǵynda vaksınanyń birinshi komponentin alatyn 18 jastan asqan qala turǵyndary qatysa alady. Qyrkúıek aıynyń basynda nátıjesin jarıalaımyz. Konkýrstyń ádil ótýi jáne vaksınasıalanǵandardy tolyǵymen qamtý úshin (kórsetilgen kezeńde) IT-qoǵamdastyqty jumyldyramyz, – dedi qala basshysy.

Buǵan deıin elorda ákimi "MEGA Silk Way" saýda oıyn ortalyǵynda vaksınalanǵandar arasynda avtokólik utys oıyny ótetinin habarlaǵan.