Prezıdent Qasym-Jomart Toqaev Belarýs Respýblıkasynyń premer-mınıstri Roman Golovchenkony qabyldady. Bul týraly Aqorda saıty habarlady.

Saıt málimetinshe, Toqaev Qazaqstan men Belarýstiń saýda-ekonomıkalyq, ǵylymı-tehnıkalyq, gýmanıtarlyq salalardaǵy baılanystaryn, sondaı-aq ıntegrasıalyq birlestikter aıasyndaǵy yqpaldastyǵyn oń baǵalaǵan. Ol eki memleket basshylarynyń tyǵyz baılanys jasap turatynyn jáne joǵary deńgeıde qol jetkizgen ýaǵdalastyqtardyń sátti júzege asyrylatynyn erekshe atap ótti.

– Sizdiń bul saparyńyzdyń baǵdarlamasy tyǵyz eken. Qostanaı oblysyna bardyńyz. Bul ónerkásip jáne aýyl sharýashylyǵy áleýeti turǵysynan óte mańyzdy aımaq. Naqty kelisimderge qol jetkizilipti. Senbi kúni prezıdentterińiz Aleksandr Lýkashenkomen sóılestim. Eki memleket arasyndaǵy strategıalyq seriktestikti odan ári damytý máseleleri jóninde pikir almastyq. Qazaqstan úshin Belarýs, shyn máninde, strategıalyq seriktes ári odaqtas el. Yntymaqtastyǵymyzdy nyǵaıtyp, damyta berý úshin barlyq múmkindikti jasaımyz, – dedi prezıdent Toqaev.

Qasym-Jomart Toqaev ekijaqty kelissózderdiń qorytyndysy Qazaqstan men Belarýs qatynastarynyń kókjıegin odan ári keńeıte berýge múmkindik beretinine senim bildirdi.  

– Árıne, bul ýaǵdalastyqtar bir sáttik emes, sondyqtan oǵan baıyppen qarap, júktelgen mindettemelerdi oryndaýymyz kerek. Iaǵnı, bos sózge maldanbaı, sizdiń tarapyńyzdan jáne úkimetter deńgeıindegi kelissózder barysynda aıtylǵan barlyq máseleni naqty sheshý qajet, – dedi memleket basshysy.

Belarýs premer-mınıstri Roman Golovchenko Aleksandr Lýkashenkonyń sálemin jetkizdi jáne eki eldiń saýda-ekonomıkalyq baılanystarynyń perspektıvalaryna egjeı-tegjeıli toqtaldy.

– Biz árdaıym odaqtas ári seriktes elmiz. Adamı faktor – iskerlik qatynastardy damytý úshin asa mańyzdy. Sondyqtan pandemıadan keıingi kezeńde saýda-ekonomıkalyq yntymaqtastyǵymyzdyń qarqyndy damıtynyna senimdimiz. Belarýstiń Qazaqstanǵa, al Qazaqstannyń Belarýske shyǵaratyn eksporty jyldam artyp keledi. Bul Qazaqstan úshin óte jaqsy faktor bolyp tabylady, – dedi Roman Golovchenko.