Bilim jáne ǵylym mınıstri Asqat Aımaǵambetov Úkimet otyrysynda mektepterdegi qaýipsizdik sharalary týraly aıtty.

– Qazir elimizdiń barlyq mektepteri beınebaqylaý kameralarmen 100% qamtamasyz etildi. Desek te, bilim men ǵylym jáne İshki ister mınıstrlikteriniń birlesip júrgizgen monıtorıńi osy kameralardyń 55% ǵana talaptarǵa saı ekenin kórsetti. Bul máselelerdi sheshý úshin jergilikti búdjetterden 1,4 mlrd teńge qarajat qarastyryldy.

Osyǵan baılanysty Soltústik Qazaqstan men Shyǵys Qazaqstan oblystarynda beınebaqylaý júıeleri máselesi sheshimin tabady. Túrkistan, Atyraý, Jambyl oblystarynda qarajat jetkiliksiz deńgeıde qarastyrylǵan. Jergilikti ákimdikterge tıisti qarajat bólýlerin suraımyz, — dedi mınıstr.

Aımaǵambetovtyń aıtýynsha, bilim berý uıymdarynda dabyl túımelerin ornatý jumystary júzege asýda. Búgingi tańda olardyń sany – 648. Bul másele tek Almaty men Nur-Sultan qalalarynda tolyǵymen sheshilgen.

– Problemany sheshý úshin jergilikti búdjetten 980 mln teńge somasynda qarajat kózdelgen. Biraq bul áli de jetkiliksiz. Túrkistan, Pavlodar, Batys Qazaqstan oblystarynda qarajat tolyq qarastyrylmaǵan. Sonymen qatar qalalarda ornalasqan bilim berý uıymdaryn lısenzıalanǵan kúzetpen qamtý qajet.

Mamandandyrylǵan kúzet qyzmeti búgingi kúni qala mektepteriniń 38%-ynda engizilgen. Jergilikti atqarýshy organdar qosymsha 828 mln teńge mólsherinde soma bóldi. Biraq áli de qosymsha qarjy bólý kerek. Qarajat 8 óńirde jetkiliksiz: Jambyl, Qostanaı, Pavlodar, Túrkistan, Qyzylorda, Batys Qazaqstan, Mańǵystaý oblystary men Shymkent qalasynda. Bul bilim berý uıymdary bolǵannan keıin kúzet ár jyl saıyn aýysa bermeý úshin arnaıy kúzet qyzmetimen qol qoıylatyn kelisimsharttaryn kem degende 1-3 jylǵa deıin uzartý múmkindigin qarjy mınıstrliginen qarastyrýdy surap otyrmyz, – dep atap ótti Asqat Aımaǵambetov.