Bilim jáne ǵylym mınıstri Asqat Aımaǵambetovtiń tapsyrmasy boıynsha qazaqstandyq joǵary oqý oryndary stýdentter arasynda vaksınasıany qoldaý aksıasyn bastaıdy. Bul týraly bilim jáne ǵylym vıse-mınıstri Qýanysh Erǵalıev habarlady.

Vıse-mınıstr koronavırýs ınfeksıasyna qarsy vaksına saldyrǵan stýdentter joǵary oqý oryndarynyń múmkindikterine baılanysty oqýǵa, jataqhanalarda turýǵa jeńildik alyp, túrli syılyqtarǵa ıe bolatynyn aıtty. Tek stýdentter ǵana emes, sonymen qatar joǵary oqý oryndarynyń ekpe saldyrǵan oqytýshylary da materıaldyq materıaldyq yntalandyrýǵa ıe bolady.

– Ál-Farabı atyndaǵy QazUÝ, L.N.Gýmılev atyndaǵy EUÝ, Abaı atyndaǵy QazUPÝ, Q.I. Sátbaev atyndaǵy QazUTZÝ, M.Áýezov atyndaǵy OQÝ, M. Ótemisov atyndaǵy BQÝ, H.Dosmuhamedov atyndaǵy Atyraý ýnıversıteti vaksınasıalaýdy qoldaý boıynsha aksıalardy bastap ketti. Birqatar joǵary oqý ornynyń stýdentteri úshin oqýǵa, jataqhanalarda turýǵa jeńildikter, saýyqtyrý shıpajaılaryna tegin joldamalar, tegin tamaqtaný jáne qoǵamdyq kólikti paıdalaný talondary qarastyrylǵan, – dedi Qýanysh Erǵalıev.

Sondaı-aq joǵary oqý oryndary vaksınasıalanǵan stýdentter úshin shet tilderin, kompúterlik saýattylyq jáne kásipkerlik daǵdylardy damytatyn tegin kýrstar uıymdastyrýdy josparlap otyr.

Ekpe saldyrǵan keıbir ýnıversıtetterdiń stýdentteri fıtnes zaldaryna, baseınge, teatrǵa, kınoteatrǵa jáne konsertterge tegin bara alady. Al vaksınasıalanǵan oqytýshylar qosymsha aqy nemese aqyly demalys alady.

– Vaksınasıa máseleleri men onyń sheshilý joldaryn joǵary oqý oryndarynyń ózderi qabyldaıdy. Mınıstrdiń tapsyrmasy boıynsha joǵary oqý oryndary stýdentter men oqytýshylardy vaksınasıalaýǵa shaqyryp, yntalandyrý boıynsha sharalar qabyldap jatyr. Bul aksıa bizdiń azamattardyń sanasyn oıatýǵa kómektesedi dep senemiz. Biz birlese otyryp, qaýipti vırýsty jeńe alamyz jáne karantın múmkindiginshe tez aıaqtalady dep úmittenemiz. Basqa joǵary oqý oryndaryn da vaksınasıany qoldaý úshin yntalandyrý sharalaryn uıymdastyrýǵa shaqyramyz. Sebebi bul koronavırýstyń taralýyn toqtatýdyń jalǵyz joly, – dep atap ótti Bilim jáne ǵylym vıse-mınıstri Qýanysh Erǵalıev.