"IRINA KAĬRATOVNA" mýzykalyq toby instagram paraqshasynda jańa mýzykalyq vıdeo tızerin jarıalady. Jelidegi jazbada beınebaıan elorda kúni men Qazaqstan tuńǵysh prezıdentiniń týǵan kúni – 6 shildede shyǵatyny habarlanǵan.
Vıdeoda kostúm-shalbar kıgen er adamdar men jartylaı jalańash bılip júrgen qyzdardyń aldynda kresloda moınyna altyn alqa taǵynǵan halattaǵy er adamnyń rıza bolyp otyrǵany beınelengen.
Jeli qoldanýshylary jazba astyna túrli pikir qaldyryp jatyr. Biri "top kezekti bomba daıyndap qoıǵanyn" jazsa, keıbiri "kezekti ret joǵarydaǵylardy (sheneýnikter - red) kelemejdeıtin vıdeo shyǵar" dep topshylaıdy. Al keı qoldanýshylar vıdeony "Nazarbaevtyń týǵan kúnine jasalǵan syılyq" dep jazǵan.
Posmotret etý pýblıkasıý v Instagram
"IRINA KAĬRATOVNA" qazaqsha, oryssha aralastyryp án jazatyn, youtube jelisine arnalǵan satıralyq jobalar jasaıtyn shyǵarmashylyq top. Olar ánderi men jobalarynda eldegi jemqorlyq, kózboıaýshylyq, otbasylyq zorlyq-zombylyq sıaqty saıası, áleýmettik taqyryptardy, qoǵamda qyzý talqylanatyn máselelerdi qozǵaıdy. Top rejıseri – Qýanysh Beısekeev. Vıdeolardaǵy ashyq ta astarly kórinisterdi negizinen Qýanysh Beısekeev oılap tabady.
2020 jyldyń sońynda shyqqan "5000" dep atalatyn klıp qoǵamda qyzý talqylanyp, jyly qabyldandy. Mýzykalyq vıdeoda 1937-1938 jyldardaǵy saıası repressıa, jaýgershilik soǵystarda qazaq halqynyń qyrylǵany, saıası ólimder, elordadaǵy LRT qurylysy, byltyr shildede epıdemıologıalyq ahýal asqynyp, adamdar koronavırýstan kóptep qaıtys bolyp jatqanda astana kúninde qala ákimshiliginiń salút uıymdastyrǵany sekildi oqıǵalardyń elementteri kórsetilgen. Vıdeo búginde 27 mıllıonǵa jýyq qaralym jınaǵan. 437 myń qoldanýshy laık, 10 myń qoldanýshy dızlaık basqan. 60 myńǵa jýyq komment jazylǵan.
Bir jarym aı buryn toptyń reseılik jýrnalıs Iýrıı Dýdke bergen suhbaty jarıalandy. 2 saǵatqa jýyq ýaqytqa sozylatyn suhbat negizinen top shyǵarmashylyǵy, olardyń Qazaqstan qoǵamyndaǵy jaǵdaılarǵa beınebaıandary arqyly kózqaras bildirýi, qazaq halqynyń mentalıteti týraly órbıdi.
Suhbattyń 33 mınýtynda top rejıseri Qazaqstandaǵy jemqorlyq, búdjet qarajatyn jymqyrý derekteri týraly aıtady.
– Qazaqstanda óte jıi jymqyrady. Bul eldegi basty máselelerdiń biri. Urlaıtyn adamda "urlaý - jaman áreket" degen moraldyq prınsıp bolmaıdy. Ondaı adamdar damymaıdy, olar kelesi urpaq týraly oılamaıdy, eldiń damýy týraly basyn qatyrmaıdy. Mundaı adamdar aqyryna deıin óziniń bıligin saqtap qalýǵa tyrysady. Óıtkeni olar úshin bılik aqsha tabýdyń ońaı joly bolyp ketken. Mundaı adamda bılikte otyrǵanda, mańyna naǵyz kóshbasshylardy, emes, ózine adal adamdardy jınaıdy. Aıtalyq, ákim myqty saıasattanýshy, top-menedjer bolǵany úshin emes, bılikke adal bolǵany úshin ǵana oryntaǵynda otyr. Bul olar úshin óte mańyzdy. Bıliktegi tizbek osyndaılardan quralǵan. Al mundaı úkimette damý bolmaıdy, – deıdi Qýanysh Beısekeev.
Rejıser sondaı-aq Qazaqstannyń tuńǵysh prezıdenti Nursultan Nazarbaev saıasatyna synı kózben qaraıtynyn jasyrmaıdy.
Pikir qaldyrý