Pavlodar oblysy Aqsý qalasynda óz-ózine qol salǵan polıseıdiń máıiti tabyldy. Bul týraly oblystyq polısıa departamenti habarlady.

– 5 shildede Aqsý qalasynda túngi saǵat 23:40-ta polısıa maıorynyń máıiti tabyldy. Ol óz-ózine qol salǵan (asylyp qalǵan), – dedi oblystyq polısıa departamenti basshysynyń orynbasary Jandos Orymbaev.

Qazir atalǵan is boıynsha Qylmystyq kodekstiń 105-baby (Ózin-ózi óltirýge deıin jetkizý) boıynsha sotqa deıingi tergeý jumystary bastaldy.

Eske sala keteıik, osy jyldyń mamyr aıynda Pavlodar oblysy Jelezın aýdandyq prokýratýrasynyń ǵımaratynda 29 jastaǵy aǵa tergeýshi ózine oq atqan bolatyn. Qyzmettik qarýdan atylǵan oq qyzmetkerdiń oń ıyǵyna tıgen. Er adamǵa oblystyq aýrýhanada ota jasalyp, keıinnen Pavlodar aýrýhanasyna jetkizilgen.

Oblystyq prokýratýra qyzmettik tergeý júrgizip, oqıǵa bolǵan kúni aýdan prokýrorynyń orynbasary polısıa qyzmetkeriniń jumysyn synaǵanyn, sodan keıin ol ózin-ózi atqanyn anyqtady. Júrgizilgen is nátıjeleri boıynsha Pavlodar oblysy prokýratýrasynyń tártiptik komısıasynyń sheshimimen Jelezın aýdany prokýrorynyń orynbasary jáne aýdan prokýrory qyzmetinen bosatylǵan.