2021 jylǵy qyrkúıek aıynda barlyq mektepke deıingi bilim berý uıymdarynda, mektepterde, kolejderde, arnaıy jáne áskerı joǵary oqý oryndarynda memlekettik attestasıa bastalady. Bul týraly bilim jáne ǵylym  mınıstrligi habarlady.

– Memlekettik attestasıa profılaktıkalyq baqylaý úlgisinde ótkiziledi. Negizgi maqsat jalpyǵa mindetti memlekettik bilim berý standartynyń talaptaryn oryndaý sharalaryn qadaǵalaý. Sondaı-aq bilim berý uıymdaryna ádistemelik kómek beriledi, – dedi bilim salasyndaǵy sapany qamtamasyz etý departamentiniń basshysy Gúlnár Ermekbaeva. 

Attestasıalyq komısıa biryńǵaı respýblıkalyq reestrge kiretin sarapshylardyń tizimi negizinde jasaqtalady. Al tekseristiń ózi qashyqtan ótedi. Sarapshylar bilim berý uıymyna barmaıdy. Olar bilim berý uıymdary jibergen qujattardyń elektrondyq nusqasy negizinde óz baǵasyn beredi.

– Atap aıtqanda, oqýshylardyń bilim deńgeıi baǵalanady, keshendi testileý ótkiziledi. Ata-analar arasynda saýalnama uıymdastyrylady. Sondaı-aq bilim berý uıymdaryna óz-ózine baǵa berýge múmkindik jasalady.

Bul – halyqaralyq tájirıbe. Ol da baqylaýdyń bir mehanızmi, ondaı shara bilim berý uıymynyń derbestigin yntalandyrýǵa, sondaı-aq, bilim berý jumysyn jetildirýge baǵyttalǵan, –dedi Gúlnár Ermekbaeva.

Oqýshylardyń bilimin baǵalaý aıasynda testileý júrgiziledi. Bastaýysh synyptarda – eki pán, negizgi ortasha bilim úshin úsh pán, al jalpy orta bilim alýshylary tórt pán boıynsha test tapsyrady.

Kásibı-tehnıkalyq bilim berý uıymdarynda eki salalyq pán boıynsha testileý uıymdastyrylady. Al mektepke deıingi bilim berý jáne tárbıeleý aıasynda ata-analar arasynda saýalnama júrgiziledi.

Mınıstrlik ókili bes jyldyń ishinde barlyq bilim berý uıymy balabaqsha, mektep, kolej, arnaıy jáne áskerı joǵary oqý oryndary da memlekettik attestasıadan ótetini josparlanyp otyrǵanyn aıtty.