Qazaqstannyń eńbek sińirgen qaıratkeri, rejıser, senarıst jáne akter Satybaldy Narymbetov 75 jasynda dúnıeden ótti. 


Qaraly habardy Mádenıet jáne sport mınıstrliginiń baspasóz qyzmeti rastady.

Satybaldy Narymbetov 1946 jyly 7 naýryzda Túrkistan oblysy, Túrkistan aýdany, Ashysaı aýylynda týǵan. Máskeý qalasyndaǵy memlekettik kınematografıa ınstıtýtyn bitirgen.

1984 jyly joǵary rejıserlik kýrsty (G.N. Danelıanyń sheberhanasy boıynsha) bitirgen.

1969 jyldan "Qazaqfılm" stýdıasynda senarıshi ári kınorejısser retinde qyzmet etti.

1970 jyldan - "Qazaqfılm" kınostýdıasynyń kınorejısseri boldy.

2005 jyldan beri Sháken Aımanov atyndaǵy "Qazaqfılm" AQ "Debút" birlestiginiń jetekshisi bolǵan.

"Qurmanǵazy" atty derekti fılmin (1972 jyly), "Zaýal (1981 jyly), "Kúzgi buralań jol" (1984 jyly) qysqa metrajdy fılmi, "Uryn kelgen kúıeý" (1987 jyly), "Sozaqtan shyqqan Gamlet" (1990 jyly), "Kózimniń qarasy", "Jas akordeonshynyń ómirbaıany" (1994 jyly), "Ompa" (1998 jyly) jáne taǵy basqa kórkem fılmderge rejıserlik etken.