Shymkentte  348 muǵalim  óz sanatyn joǵarlatý úshin  jalǵan sertıfıkat satyp alyp, memleketten tólenetin ústemaqy alyp kelgeni anyqtaldy. Bul týraly otyrar.kz saıty habarlady. 

Saıt málimetinshe, tekseris nátıjesinde kóptegen pedagogtiń attestasıadan ótpegeni, tipti testileý ortalyǵyna kelmegeni, qujatty satyp alǵany anyqtalǵan. Al qala mektepteriniń birinde dırektor bolǵan pedagog osy iske qatysy bar kúdiktilerdiń biri bolyp otyr. Muǵalimderdiń 80 paıyzy eki jyl ishinde alǵan ústemaqylaryn búdjetke qaıtaryp úlgergen. 

– 2018-2019 jyldary Shymkent qalasynyń 348 pedagogy osyndaı jalǵan aqparatqa ıe bolyp, ulttyq biliktilik test tapsyrmaı-aq nemese odan qulap qalsa da, arnaıy osy testileýden ótti degen jalǵan qujattarymen osyndaı sanattarǵa ıe bolǵan. Solaı ókimetke 194 399 000 teńge qarjyǵa zıan keltirgen. Shymkent qalalyq bilim basqarmasynyń bas mamany Dosjanov Qasymhan jáne sol kezdegi 79 mekteptiń dırektory, oqý isiniń meńgerýshisi bolǵan Qarabaeva Aınur degen azamatshalar kúdikti dep tanyldy. Ál-Farabı aýdanynda sot prosesteri júrýde, – dedi Shymkent qalalyq bilim basqarmasynyń basshysy Janat Tájıeva.  

Qalanyń bas ustazy jalǵan kýálik alyp, basy daýǵa qalǵan muǵalimder endi biliktilikterin qaıta dáleldeýi úshin synaqtan ótýi múmkin ekenin, bári sot sheshimine baılanysty ekenin aıtty.