"Shopan ata" ulttyq mal ósirýshiler qaýymdastyǵynyń tóraǵasy Almasbek Sadyrbaev qýańshylyqtan bolyp jatqan mal qyrǵyny máselesin sheshýdiń 3 jolyn usyndy.

Maman máseleniń sheshimi problemany moıyndaýdan bastalýy kerek dep sanaıdy.

– Qazirgi bolyp jatqan jaǵdaı jut pa? Jut! Mine, osyny úkimet, bılik moıyndaýy kerek. moıyndaǵanda ǵana sheshimge barady. Moıyndamaı jatyp "ne sheshemiz?" deıdi. Men astanadaǵy úlken eki jınalysta boldym. Ekeýinde de maǵan "dokajı" deıdi. Mine, áńgime nede? Al olarǵa aýdandardan teris aqparat kelip jatyr, – dedi maman Yesti podcast youtube jobasynda.

Mal sharýashylyǵy mamany máseleniń ekinshi sheshimi retinde jut jaılaǵan Mańǵystaý, Aral óńirlerindegi sharýashylyqtardy soltústik, ortalyq Qazaqstanǵa kóshirýdi usynady.  Sózinshe, qýańshylyq qysqan aımaqtarǵa shóp tasý tıimsiz. "Shóp tasý degenimiz – aýa tasý" degen ol "aýa tasýdy" toqtatý kerektigin aıtty.

Almasbek Sadyrbaev sondaı-aq halyq qolyndaǵy malyn tirkeýden ótkizý qajet ekenin, shuraıly aımaqtarǵa kóshe almaǵan, maly tirkelgen sharýaǵa jem-shóppen kómek berilýi qajettigin, arpa-bıdaıdy shetelge asyrýdy toqtata turý keregin jetkizdi. Maman sharýaǵa kómek bergende de tegin emes, "qýańshylyqtan keıin qaıtarasyń" dep berý kerek degen pikirde.