Atyraý oblysynda turǵyndardy vaksınasıaǵa yntalandyrý maqsatynda "Vaksına saldyryp, aqshalaı syılyq ut" aksıasy ótip jatyr. Aksıa aıasynda alǵashqy sertıfıkattar tabystaldy. Bul týraly Caspian New telearnasy habarlady.

Ótken aptada Atyraý oblysynyń Azamattyq Alánsynyń uıymdastyrýymen 10 adam 200 myń teńgeden ıelengen. Jeńimpazdar kezdeısoq sandar generatorynyń kómegimen anyqtalǵan. 

Azamattyq Aláns prezıdenti Álibek Semǵalıev mundaı bastama vaksınasıalaý qarqynyn jedeldetýge septigin tıgizetinin aıtady.

Azamattyq Aláns aqparatynsha, aksıa aıasynda qyrkúıek aıyna deıin ár 10 kún saıyn 200 myń teńgelik 10 sertıfıkat oınatylmaq.  Utystyń ekinshi kezeńine 30 maýsym men 30 shilde aralyǵynda ekpe saldyrǵandar avtomatty túrde  qatysady.

Sondaı-aq 3 mıllıon teńgeden 4 sertıfıkat oınatylady. Sońǵy utysqa 1 aqpannan bastap oblystaǵy ekpe pýnkterinen vaksına saldyrǵandar qatystyrylady. Jalpy utys quny 40 mıllıon teńgeni quraıdy.