Qostanaı oblysyna qarasty Tobyl óńirinde 3 adam "sibir" jarasyn juqtyrǵan. Bul týraly Astana arnasy habarlady.

Aýrýdy jergilikti seriktestiktiń jumysshylary juqtyrǵany anyqtaldy. Dárigerler qazirgi ýaqytta jaǵdaılary turaqty ekenin aıtty.

Veterınarıa basqarmasynyń basshylyǵy Denısov aýdanyndaǵy jaýapkershiligi shekteýli seriktestik aýmaǵyna karantın engizilgenin málimdedi. Ondaǵy 10-nan astam iri qaranyń óleksesi arnaıy peshterde órtelip, qora-qopsy zalalsyzdandyrylǵan. Qalǵan túliktiń bárine vaksına salynǵan. Basqa eldi-mekenderdegi epızootıalyq jaǵdaı turaqty ekenin atap ótti.

– Sharýashylyq ózi jeke ornalasqan. Mańaıynda eshqandaı jaqyn eldimeken joq. Jeke sektorlardyń da maly joq. Sondyqtan jańaǵy dıagnoz anyqtalǵannan keıin veterınarıa basqarmasynyń basshylyǵymen jáne qadaǵalaýymen Denısov aýdanyndaǵy veterınarıa stansıasy qajetti is-sharalardy atqardy. Bizdiń boljam boıynsha sibir jarasynyń qozdyrǵyshyn jyrtqysh ań, qustar sosyn kemirgishter basqa jaqtan ákelýi ábden múmkin, – dedi Qostanaı oblystyq veterınarıa basqarmasy basshysynyń orynbasary Baýyrjan Beket.