Mektep muǵalimderi tegin sıfrlyq kýrstardan ótedi. Onlaın-sabaqtar 2 tamyzda bastalyp, 31 qazanǵa deıin jalǵasady. Oǵan pedagogıkalyq joǵary oqý oryndarynyń stýdentteri de qatysa alady. Bul týraly bilim jáne ǵylym mınıstrligi málimdedi.
– Pandemıa jaǵdaıynda muǵalimderdiń róli, qoǵamdaǵy orny men eńbegi odan ári aıqyndala tústi. Sıfrlandyrý zamanynda muǵalimderdiń İT quzirettilikterin arttyrý qajet. Kýrs pedagogterdiń sıfrlyq daǵdylaryn jetildirýge baǵyttalǵan. Kýrs baǵdarlamasy Eýropalyq bilim qorymen birlesip ázirlendi,– dedi bilim jáne ǵylym mınıstrligi "Órleý" biliktilikti arttyrý ulttyq ortalyǵynyń basqarma tóraıymy Ásel Muhametjanova.
Onyń aıtýynsha, muǵalimder Fınlándıa men Ońtústik Koreıanyń bilim berý prosesine ınovasıalyq tehnologıalardy ıntegrasıalaý tájirıbesimen tanysady. Sondaı-aq pedagogter ActivStudio, Pictochart, Jamboard, Prezi, Flippity sandyq baǵdarlamalaryn kásibı túrde meńgerip, ulttyq bilim berý derekqorynyń resýrstaryn paıdalanýdy úırenedi.
Pikir qaldyrý