QMDB tóraǵasy, bas múftı Naýryzbaı qajy Taǵanuly Qurban aıt merekesi byltyrǵydaı onlaın-rejımde ótetinin málimdedi. Bul týraly ol ortalyq komýnıkasıalar qyzmetindegi brıfıńte aıtty.

– Bıylǵy 20 shilde kúni respýblıka aýmaǵynda tańǵy saǵat 7.00-de qatań sanıtarlyq norma talaptaryn saqtaı otyryp, "sary", "jasyl" aımaqtarda 10 mınýttyq Qurban aıt namazy oqylady. Degenmen, "qyzyl" aımaqta Qurban aıt namazyn oqý jergilikti sanıtarlyq memlekettik bas dárigerdiń Qaýlysyna sáıkes júzege asyrylady. Osy oraıda, Qurban aıt namazyn ótkizý boıynsha QMDB-nyń ókil ımamdary jergilikti bas sanıtar dárigerlermen birlesip, arnaıy brıfıńter ótkizetin bolady. Jamaǵattan qaýipsizdik sharalaryn qatań saqtaýdy, aıt namazy bitken sátte meshit aýlasynda uzaq turaqtamaýdy suraımyz, – dedi Bas múftı.

Bas múftıdiń aıtýynsha, qurbandyqqa shalynatyn mal arnaıy qasaphanada soıylady. Qurban shalý kezinde qasaphanalarda sanıtarlyq erejeler qatań saqtalýy tıis.

– Sanıtarlyq erejelerdi qatań saqtaýdy, meshit aınalasynda turaqtamaýdy suraımyz. Qurban shalýǵa nıet etken azamattar byltyrǵydaı www.qurban2021.kz saıty arqyly tapsyrys berip, onlaın rejımde qurbandyq shalýǵa bolady, – dedi Narýyzbaı qajy Taǵanuly.

Bas múftı aýyldyq jerlerde qurbandyq shalatyndarǵa eshqandaı shekteý joǵyn atap ótti.

Bıyl Qurban aıt meıramy 20, 21, 22 shilde kúni toılanady. Qurban aıt oraza aıttan soń 70 kúnnen keıin bastalyp, 3 kúnge sozylady.

Buǵan deıin Almaty qalasynyń bas sanıtar dárigeri Jandarbek Bekshın Qurban aıt meıramyn onlaın rejımde ótkizýdi usynǵan bolatyn.