Qazaqstanda et baǵasy qymbattady. Ásirese qoı etiniń baǵasy edáýir ósken.  Bul týraly Energyprom.kz saraptama portaly habarlady.    

2021 jyly maýsymda eldegi bazarlar men dúkenderde qoı etiniń kelisi 2,3 myń teńgeden satyldy. Bul ótken jylmen salystyrǵanda 14,4 paıyzǵa qymbat. Eń joǵary baǵa Nur-Sultan, Almaty qalalarynda, onda ettiń bir kelisi  2,9 myń teńge, al Qaraǵandyda 2,6 myń teńgeden satylýda. Eń tómengi baǵa  Oral men Petropavlda, onda ettiń kelisi 1,7 myń teńge. 

Qazirgi ýaqytta usaq maldyń analyq tuqymyn eksporttaýǵa tyıym salynǵan. Búginde Qazaqstanda jylyna 172,4 myń tonna qoı eti óndiriledi. İshki naryqtyń suranysy 100,7 paıyzǵa qamtylǵan. 2021 jyldyń tórt aıynda 538 tonna qoı eti, BAÁ, Ózbekstan, Bahreın jáne Reseı Federasıasyna eksporttalǵan. 

Búginde úkimet, qoı ósirýshiler ulttyq qaýymdastyǵynyń tóraǵasy Almazbek Sadyrbaevtyń iri, usaq mal eksportyna tolyq tyıym salý týraly usynysyn qarastyryp jatyr. İshki naryqta qoı etiniń qymbattaýynyń negizgi sebebi mal etin eksporttaý bolyp otyr.