Almatyda tarazdyq jigit ózin polısıa qyzmetkeri retinde tanystyryp, ótip bara jatqan adamdardy tonaǵan. Bul týraly Polisia.kz saıty habarlady.

Saıt málimetinshe, Jambyl oblysynyń Sh. esimdi 20 jastaǵy turǵyny mundaı ońaı paıda tabýdyń ádisin bir-eki ret ǵana jasamaǵan.

Sh. esimdi er adam buryn tonaý isi boıynsha sottalǵan. Bul joly qylmysynyń ádisin ózgertip, ózin polısıa qyzmetkeri retinde kórsetip, ótip bara jatqan adamdardy tonaýǵa kóshken. Qylmys jasaýshy ustalyp polısıa formasy tárkilendi. Sh. esimdi azamat polısıa formasyn erkin naryqtan satyp alǵan.

– Sh.esimdi er adamnyń is-áreketi QR QK-niń 191-baby (tonaý) 3-bólimi (turǵyn, qyzmettik, óndiristik úı-jaıǵa ne qoımaǵa zańsyz kirýmen jasalǵan tonaý – múlki tárkilenip, bes jyldan on jylǵa deıingi merzimge bas bostandyǵynan aıyrý) boıynsha jazalanady. Kúdiktiniń Almaty aýmaǵynda jáne Almaty oblysynyń shekaralas aýdandarynda jasalǵan basqa da ashylmaǵan qylmystarǵa qatystylyǵy tekserilip jatyr. Qazirgi ýaqytta osy adam jasaǵan bes qylmystyq epızod anyqtaldy, – dedi Medeý APB-nyń bastyǵy Dáýren Ótebaev.