Nur-Sultan ákimi Altaı Kólginov qalada epıdemıologıalyq ahýaldy jaqsartý maqsatynda qabyldanyp jatqan sharalar týraly aıtty. Bul týraly áleýmettik jelidegi paraqshasynda jazdy.

– Koronavırýs indetin lokdaýn, shekteý sharalaryn engizý arqyly jeńe almaımyz. Bul sharalar COVID-19 ınfeksıasynyń taralý kórsetkishin ýaqytsha tómendetýge ǵana múmkindik beredi, al bul óz kezeginde naýqastardy aman alyp qalýǵa septigin tıgizedi, – dedi  ákim.

Kólginov koronavırýs ınfeksıasymen kúreste tómendegideı sharalar qabyldanyp jatqanyn aıtty.

• Mobıldi brıgadalar sanyn arttyrý. Qalada koronavırýs ınfeksıasyn juqtyrǵan naýqastardyń úıine baratyn 186 brıgada bar. Olar naýqastardyń densaýlyǵyn tekserip, PTR alady, sondaı-aq qarym-qatynasta bolǵan azamattardy tekseredi. Brıgadalar sanyn taǵy 100 birlikke kóbeıtýdi tapsyrdym. Endi 300-ge jýyq mobıldi brıgada qyzmet etetin bolady.
• Medısına mekemelerin barynsha jabdyqtaý. Medısına mekemelerin qajetti apparattarmen jabdyqtaýdy bıyl da jalǵastyramyz. Máselen, qosymsha jyljymaly rentgen apparattary, pasıent monıtorlary, perfýzorlar jáne t.b. jetkizildi.
• Dári-dármekpen qamtamasyz etý. Dári-dármekter men jeke qorǵanys quraldarynyń eki aılyq qory bolýy tıis.
• Vaksınasıa qarqynyn arttyrý. Medısına mekemeleriniń bárinde, sol sıaqty iri saýda oıyn-saýyq ortalyqtary men saýda úılerinde vaksınasıalaý pýnkti ashyldy. Sonymen qatar, eńbek ujymdaryn vaksınasıalaý úshin kóshpeli brıgadalar uıymdastyryldy. Qazir 318 myńnan astam adam vaksına aldy.