23 shilde kúni ál-Farabı atyndaǵy Qazaq ulttyq ýnıversıteti Fılosofıa jáne saıasattaný fakúlteti Dintaný jáne mádenıettaný kafedrasynyń profesory, fılosofıa ǵylymdarynyń doktory Shamshıa Rysbekova dúnıeden ozdy. Bul týraly kafedra ujymy málim etti.

"Ujymymyz orny tolmas qaıǵyǵa ushyrap, bilikti maman, óz isiniń sheberi, ulaǵatty ustaz, tanymal ǵalym, elimizdegi dintaný salasynyń qalyptasýyna, damýyna óz úlesin qosqan áriptesinen aıyrylyp qaldy.

Shamshıa Rysbekova fakúltet pen kafedra tarapynan tapsyrylǵan qoǵamdyq jumystardy jaýapkershilikpen, ýaqytynda atqardy. Ǵylymı-zertteý jumysyn ustazdyq qyzmetpen sabaqtastyra biletin, jaýapkershiligi mol, áriptesteri arasynda qurmetke ıe qyzmetker bolǵan. Árqashan jan-jaǵyna adal, qyzmetine asa jaýapkershil, shákirtterine talapshyldyǵymen qosa qamqorlyǵy basym bolǵan Shamsıa Saıdǵalıqyzy ómirge degen pozıtıvti kózqarasymen, qaıratty tabandylyǵymen erekshe jan edi. Aýyr dert janynan qansha batsa da, esh syr bermeı, sol batyl, ótkir minezimen esimizde qaldy. Asqan sabyrlyq pen shydamdylyqty bir boıyna jınap, aýyrsynǵanyn bildirmeı, únsiz kete bardy...

Ál-Farabı atyndaǵy Qazaq ulttyq ýnıversıteti Fılosofıa jáne saıasattaný fakúlteti, Dintaný jáne mádenıettaný kafedrasynyń ujymy fılosofıa ǵylymdarynyń doktory Rysbekova Shamshıa Saıdǵalıqyzynyń qaıtys bolýyna baılanysty marqumnyń otbasy men týystaryna qaıǵyryp, kóńil aıtady" delingen qaraly habarda.

Rysbekova Shamshıa Saıdǵalıqyzy – Ál-Farabı atyndaǵy Qazaq ulttyq ýnıversıteti fılosofıa jáne saıasattaný fakúltetiniń túlegi. Eńbek jolyn 1993 jyly qazaq fılosofıasy tarıhy bóliminde kishi ǵylymı qyzmetker retinde bastap, 1995 jylǵy aqpan aıynan fılosofıa jáne saıasattaný ınstıtýty janyndaǵy aspırantýrada oqyǵan. 2003 jyldan bastap ál-Farabı atyndaǵy QazUÝ, Fılosofıa jáne ǵylym ádisnamasy kafedrasynda qyzmet atqarǵan.

1999 jyly fılosofıa tarıhy mamandyǵy boıynsha fılosofıa ǵylymdarynyń kandıdaty ǵylymı dárejesin alý úshin "Problema sýshnostı ı naznachenıa cheloveka v fılosofıı Abaıa" taqyrybynda kandıdattyq dısertasıa qorǵaǵan. 2010 jyly Fılosofıa jáne din tarıhy, fılosofıalyq antropologıa, mádenıet fılosofıasy mamandyǵy boıynsha fılosofıa ǵylymdarynyń doktory ǵylymı dárejesin alý úshin "Antropologıcheskıı dıskýrs v sovremennoı relıgıoznoı fılosofıı" atty doktorlyq dısertasıa qorǵady.

Aspırantýrany bitirgennen keıin BjEA-nyń "Fılosofıa jáne tilder" kafedrasy "Fılosofıa" seksıasynyń meńgerýshisi qyzmetin atqarǵan.

Shamshıa Rysbekova 100-den astam ǵylymı eńbek, 3 monografıa jáne 15 oqý quralyn jazǵan. Tomson Reıter (Web of Science, Thomson Reuters), Scopus atty ǵylymımetrıalyq bazalarǵa kiretin nóldik emes ımpakt-faktory bar ǵylymı jýrnaldarda 15-ke jýyq maqalasy jarıalanǵan.

"Dintaný" mamandyǵy boıynsha bakalavrıat, magıstratýra jáne doktorantýra deńgeılerine Memlekettik standarttar men úlgilik jáne oqý baǵdarlamalaryn, sıllabýstardy daıyndaýǵa belsendi qatysqan.