Memlekettik jáne jergilikti basqarýdy damytý tujyrymdamasy, rásimdik-prosestik sottar jumysynyń bastalýy, sondaı-aq aýyl ákimderin saılaý. Osy jáne ózge de ózekti máseleler "Nur Otan" partıasy janynydaǵy Azamattyq qoǵamdy jáne memlekettik basqarýdy damytý jónindegi respýblıkalyq qoǵamdyq keńes otyrysynda talqylandy, dep habarlady partıanyń baspasóz qyzmeti.

Aýyl ákimderiniń saılaýyna "Nur Otan" partıasynan 584 kandıdat qatysyp otyrǵany belgili. Búgin úgit-nasıhat jumystary aıaqtalady. Onyń aıasynda 45 myńnan astam is-shara ótkizilip, 228 myńnan astam úgit materıaly taratyldy. Jalpy, 1,2 mln saılaýshy qamtyldy.

– Elimizde alǵash ret ótkizilip otyrǵan aýyl ákimderiniń tikeleı saılaýyna degen halyqtyń kózqarasy oń. Azamattardyń qyzyǵýshylyǵy joǵary ekenin baıqap otyrmyz, – dedi keńes tóraǵasy, májilis depýtaty Aıdos Sarym.

Óz kezeginde Ulttyq ekonomıka vıse-mınıstri Álibek Qýantyrov jergilikti ózin-ózi basqarýdy damytýǵa saılaýdan ózge, 2025 jylǵa deıin júrgiziletin memlekettik basqarý jáne jergilikti ózin-ózi basqarý deńgeıleri arasyndaǵy ókilettikterdi ortalyqsyzdandyrý yqpal etetinin atap ótti.

– Jergilikti ózin-ózi basqarý ınstıtýtynyń áleýetin eskere otyryp, "Jergilikti ózin-ózi basqarý týraly" zań jobasyndaǵy bólimderdiń biri – qoǵamdyq oryndardy abattandyrý jáne syrtqy bezendirý, kórme-jármeńkelik qyzmetti uıymdastyrý, qabirlerge arnalǵan jer ýchaskelerin esepke alý jáne tirkeý, komýnaldyq qaldyqtardy bólek jınaýdy uıymdastyrý máselelerin sheshý jónindegi qyzmetterdi aýdandyq deńgeıden aýyl deńgeıine berý, – dedi Álibek Qýantyrov.

Sondaı-aq, keńes músheleri memleket basshysy Qasym-Jomart Toqaevtyń ákimshilik ádilet júıesin engizý týraly tapsyrmasyn oryndaý barysyn talqylady.

Joǵarǵy sottyń ákimshilik ister jónindegi sot alqasynyń sýdıasy Aslan Túkıev aıtyp ótkendeı, barlyq 17 óńirde jáne Qaskeleń, Semeı, Jezqazǵan, Ekibastuz qalalarynda mamandandyrylǵan aýdanaralyq ákimshilik sottar (MAÁS) óz jumysyn bastady. Ol jańa sot organynyń basty ereksheligin túsindirdi.

– Azamattyq prosesten aıyrymashylyǵy kóbine jaýapker memlekettik organ bolatyn ákimshilik prosesterde talapker jaǵy álsiz. Sondyqtan ákimshilik sottarda sýdıaǵa memlekettik organmen daý kezinde talapkerge kómektesýge resmı túrde ruqsat etilgen. Máselen, sýdıa talap qoıýshymen birge talap-aryz jazady, qajet bolǵan jaǵdaıda, eger talapkerdiń ózi obektıvti sebeptermen olardy usyna almasa, dáleldemeler jınaýǵa kómektesedi. Al dáleldeý aýyrtpalyǵy tolyǵymen jaýapkerdiń jaǵyna júktelgen, – dedi Aslan Túkıev.

Sondaı-aq Joǵarǵy Sottyń sýdıasy 1 shildeden bastap MAÁS-qa 1181 talap-aryz túskenin, onyń basym bóligi jer, salyq máselelerine, memlekettik satyp alýlarǵa jáne sot oryndaýshylarynyń áreketterine qatysty ekenin aıtty.

Sonymen qatar, Keńes músheleri jumysshylardyń keıbir sanattaryna jetkilikti deńgeıde kóńil bólinbeıtinin alǵa tartty. Keńes tóraǵasy Aıdos Sarym oqý oryndarynyń ákimshilik qyzmetshilerine qatysty máseleni kóterdi.

– "Pedagog mártebesi týraly" zań qabyldanǵannan keıin muǵalimderdiń eńbek jáne áleýmettik jaǵdaılary aıtarlyqtaı jaqsardy. Alaıda mektepterde bilim oshaǵynyń ómirine tikeleı aralasatyn, biraq ógeıdiń kúıin keship otyrǵan jumysshylar bar, – dedi ol.

Osyǵan baılanysty Aıdos Sarym zańnamada mańyzdy memlekettik qyzmet atqaratyn, biraq memlekettik baǵdarlamalarǵa qatysa almaıtyn komýnaldyq qyzmetshiler mártebesin bekitýdi usyndy.

– Bir ǵana Almatynyń ózinde eshqandaı mártebesi joq 10 myńǵa jýyq adam bar. Olar qalalyq sý arnasynyń, energosbyt jáne t.b. qyzmetkerleri. Mysaly, olar jeńildetilgen ıpoteka alý úshin "Otbasy bank" baǵdarlamalaryna qatysa almaıdy. Bul jerde ortalyq jáne jergilikti atqarýshy organdar tıisti usynystar engizýi kerek, – dedi ol.

Otyrys qorytyndysy boıynsha Keńes músheleri memlekettik organdarǵa birqatar usynymdar ázirledi. Olardyń ishinde zańnamada komýnaldyq qyzmetshiler mártebesin bekitý, "Halyq únine qulaq asatyn memleket" tujyrymdamasyn oryndaý boıynsha memlekettik organdardyń aýqymdy reıtıńin engizý jáne memlekettik qyzmetshilerdi oqytýda azamattyq qoǵamnyń áleýetin paıdalaný.