Prezıdent Qasym-Jomart Toqaev sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsınniń esebin tyńdady. Bul týraly prezıdenttiń baspasóz hatshysy Berik Ýálı facebook paraqshasynda jazdy.
Mýsın Toqaevqa mınıstrliktiń bıylǵy birinshi jartyjyldyqtaǵy atqarǵan jumystary, memlekettik qyzmet kórsetý isin damytýdyń ózekti máseleleri, sondaı-aq prezıdenttiń Qazaqstan Respýblıkasy úkimetiniń keńeıtilgen otyrysynda bergen tapsyrmalarynyń oryndalýy týraly baıandaǵan.
"Memleket basshysyna ınternet sapasyn arttyrý úshin qabyldanyp jatqan sharalar týraly málimet berdi. Baǵdat Mýsınniń aıtýynsha, mınıstrlik ınternet sapasyn tekserýdi jıiletken. Sonyń nátıjesinde sapasyz qyzmet kórsetkeni úshin baılanys operatorlaryna aıyppul salynǵan.
Sonymen qatar vedomstvo basshysy prezıdentke bıylǵy alty aı ishinde Qazaqstandaǵy ınternet trafıgi 7900 petabaıtqa deıin artqanyn jetkizdi. Bul byltyrǵy bir jyl ishindegi kórsetkishpen salystyrǵanda 15 paıyzǵa artyq.
Mınıstr ınternet sapasyna qatysty negizgi kórsetkishter boıynsha ósimniń oń qarqyny bar ekenine nazar aýdardy. Qazaqstan bir jyl ishinde mobıldi ınternettiń jyldamdyǵy boıynsha Speedtest Global Index reıtıńindegi alatyn ornyn 15 satyǵa jaqsartyp, 80-shi oryndy ıelengen. Qazaqstan bekitilgen ınternet jyldamdyǵy jónindegi reıtıńte 65-shi orynda tur.
Sonymen qatar memleket basshysyna shalǵaı aýyldarda jyldamdyǵy joǵary keń jolaqty ınternetke qol jetimdilikti qamtamasyz etý úshin jer ústi orbıtalyq spýtnıktik baılanystyń jetekshi operatorlarymen birlese júrgizilip jatqan jumystar jóninde baıandaldy" delingen habarlamada.
Budan bólek Baǵdat Mýsın koronavırýs indetine qarsy kúreste jańa sıfrlyq tehnologıalardyń qoldanylýy jáne memlekettik qyzmet kórsetý úderisin ońtaılandyrý jóninde esep berdi.
Áńgimelesý sońynda prezıdent Toqaev birqatar naqty tapsyrma berdi.
Pikir qaldyrý