Bilim jáne ǵylym mınıstri Asqat Aımaǵambetov eldegi ýnıversıtetterge qarasty jumysqa turǵyzý ortalyqtary qyzmetine baılanysty pikir bildirdi.

– Jumysqa turǵyzý ortalyqtarynyń búgingi deńgeıi máz emes. Bizdiń kóńilimiz tolmaıdy. Bul barlyq ýnıversıtetterge qatysty. Olar kóbinese stýdentter úshinshi kýrsqa ótkende, oqýdy bitiredi degen ýaqytta ǵana jumysqa turǵyzý jumystaryn belsendi júrgize bastaıdy. Biraq bul jumys birinshi kýrstan bastalýy kerek. Aldyn-ala jumys izdeý kerek. Sosyn ýnıversıtetterge jumysqa turǵany týraly anyqtama qajet emes. Bul aqparatty zeınetaqy qory arqyly bilip otyrýǵa bolady, –  dedi mınıstr.

Vedomstvo basshysy bıyldan bastap grant boıynsha oqyǵan stýdentter qansha ýaqyt oqysa, sonsha ýaqytty óteýge mándettelgenin atap ótti.

– Buryn stýdentter grantqa túsip alady da, sosyn ol jaqta úsh jyl oqıdy. Sońǵy bitiretin jylyn aqyly formatqa aýysyp aıaqtaıdy. Olar muny ádeıi isteıdi, óıtkeni keıin grantty ótegisi kelmeıdi. Sondyqtan budan-bylaı grantta qansha jyl oqysa, sonsha jylyn óteýge mindetteledi. Bul normalar stýdentterdiń jaǵdaıyn jaqsartýǵa qabyldanyp otyr. Sondyqtan JOO basshylary tıisti jumystardy uıymdastyrýdy tapsyramyn, – dedi Aımaǵambetov.  

Mınıstrdiń sózinshe, endi talapkerge erteń granttyń óteýi bolatynyn týraly aqparat grantqa ótinish bergen kezden bastap beriledi. Stýdentter birinshi kýrstan bastap osy aqparattan habardar bolýǵa tıis. Al grantty tek memlekettik uıymdarda emes, jekemenshik ortalyqtarda da óteýge bolady. 

– Stýdentterdiń jekemenshik uıymdarda da jumys isteýge múmkindigi bar. Mysaly farmasıa mamandyǵy boıynsha bilim alǵan stýdent, oqýdy bitirip aýylyna qaıtyp barady. Al aýylda memlekettik dárihana joq. Sondyqtan jekemenshik oryndarda da qyzmet ete berýge bolady, –  dedi mınıstr.