El prezıdenti Qasym-Jomart Toqaevtyń bastamasymen qolǵa alynǵan aýdandyq mańyzy bar qalalar, aýyldar, kentter men aýyldyq okrýgter ákimderiniń alǵashqy tikeleı saılaýynyń qorytyndysy boıynsha «Nur Otan» partıasynyń kandıdattary jáne ózin-ózi usynýshy partıa músheleri okrýgterdiń 86%-dan astamynda jeńiske jetti. Aýmaqtyq saılaý komısıalarynyń málimetteri boıynsha, partıanyń 627 kandıdaty ákim bolyp saılandy, onyń ishinde 65-i – ózin-ózi usynýshy nurotandyqtar.

Partıanyń baspasóz qyzmeti habarlaǵandaı, úgit-nasıhat kezeńinde «Nur Otan» kandıdattary 1,2 mln saılaýshyny qamtyǵan. 45 myńnan astam kezdesý men is-shara ótkizildi. Olardyń úshten bir bóligi onlaın formatta bolsa, qalǵandary sanıtarlyq talaptardy saqtaı otyryp júzege asty. 228 myń úgit materıaly taratyldy. Úgit-nasıhat barysynda partıanyń qoǵamdyq qabyldaý bólmelerine 1,5 myń ótinish kelip túsip, olar jergilikti jerlerde jedel sheshildi.

Jeńiske jetken nurotandyqtardyń 35%-dan astamy – jańa tulǵalar, onyń ishinde bilim berý salasynyń ókilderi, kásipkerler, fermerler, al 65%-y qyzmettegi ákimder. Kandıdattardyń ortasha jasy – 46 jasty qurady. Áıelder – 11,5%, 35 jasqa deıingi jastar – 14,2%. Kópshiligi bastaýysh partıa uıymdarynyń tóraǵalary men taıaýda ótken partıaishilik praımerızdiń qatysýshylary.

Barlyq kandıdattar men shtab músheleri buǵan deıin partıanyń Saıası menedjment mektebi bazasynda semınarlardan ótip, qajetti uıymdastyrýshylyq, ádistemelik jáne basqa da qoldaýmen qamtamasyz etilgenin aıta ketken jón. Árqaısysynda aýmaqtyń múmkindigin eskere otyryp, partıanyń qoldaýymen tıisti resýrstarmen qamtamasyz etilgen óz saılaýaldy baǵdarlamasy boldy.

«Partıamyzdyń Lıderi Nursultan Ábishuly Nazarbaev aıtqandaı, nurotandyqtardyń basty qaǵıdattary – jaýapkershilik, komandalyq rýh, partıa ıdealdary men qundylyqtaryna beriktik. «Nur Otan»-nyń mindeti – tek saılaýda jeńiske jetý ǵana emes, aýyldardyń damýyna júıeli jaǵdaı jasaý, azamattardyń naqty máselelerin sheshý. Partıa óz kandıdattaryn usyna otyryp, birinshi býyn ákimderdiń el Prezıdenti Qasym-Jomart Toqaev usynǵan «Halyq únine qulaq asatyn memleket» tujyrymdamasy aıasynda halyqpen ózara árekettestiginiń jańa mádenıetin qalyptastyra otyryp, zamanaýı tásilderdi endirýde» - dep buǵan deıin atap ótken edi partıa Tóraǵasynyń birinshi orynbasary Baýyrjan Baıbek Facebook paraqshasynda.