2 tamyzda Nur-Sultan qalasynyń bas sanıtar dárigeri J. Pralıevanyń jańa qaýlysy kúshine endi. Qujatta elordanyń birqatar kásipkerlik nysandarynyń jumys tártibi jazylǵan.

Jańa qaýlyǵa sáıkes, dárihanalardan, azyq-túlik dúkenderinen, baılanyssyz jolmen qyzmet kórsetetin nysandardan basqa "Ashyq" jobasyna qatyspaıtyn kásipkerlik nysandardyń kópshiliginiń jumysyna tyıym salynǵan.

Sonymen qatar saýda oıyn-saýyq ortalyqtaryna, saýda úıleri men qala ortalyqtaryna kirý tek "Ashyq" júıesindegi QR-kodty skanerleý arqyly júzege asyrylady. Bul nysandardyń jumys kestesi — tańǵy saǵat 7-den 20:00-ge deıin. Senbi jáne jeksenbi kúnderi nysandar jumysyna tyıym salynady.

"Fýdkorttar jumysyna senbi jáne jeksenbi kúnderi tyıym salynǵan. Al dúısenbi-juma kúnderi adam sanyn 50 orynnan asyrmaı saǵat 7.00-den 20.00-ge deıin "Ashyq" jobasy arqyly jumys isteı alady. Jumys jáne demalys kúnderi saǵat 7.00-den 20.00-ge deıin tamaq jetkizýge jáne ózimen alyp shyǵýǵa ruqsat etiledi. Túrli aksıalar, jármeńkeler, shoýrýmdar men utys oıyndaryn (onlaın-formatty qospaǵanda) ótkizýge tyıym salynady" delingen qaýlyda.

"Ashyq" jobasyna qatyspaıtyn qoǵamdyq tamaqtaný oryndary — meıramhanalar, kafeler, kofehanalar, asqanalar ornalasqan jerine qaramastan tamaq jetkizý nemese alyp shyǵý qyzmetterin kórsete alady. "Ashyq" jobasyna qatysýshylarǵa tek dúısenbi-juma kúnderi saǵat 07.00-den 20.00-ge deıin jumys isteýine ruqsat etiledi. Bul rette mekemeniń ishinde jáne ashyq aýada toltyrylýy 50 paıyzdan, oryndar sany 50-den asyp ketpeýi kerek.