2 tamyzda Qyrǵyzstannyń  eks-prezıdenti Asqar Aqaev Bishkekke ushyp keldi. Bul týraly Spýtnık Qyrǵyzstan habarlady.

Qyrǵyzstannyń alǵashqy prezıdenti 2005 jylǵy tóńkeristen soń Reseıge qashyp ketken bolatyn. Burynǵy prezıdent sodan beri óz elinde bolmaǵan.

"Memlekettik ulttyq qaýipsizdik komıteti qabyldaǵan sharalar nátıjesinde 2 tamyzda burynǵy prezıdent Asqar Aqaev Bishkekke jetkizildi. Kóp uzamaı ol vedomstvoaralyq tergeý tobyna berildi. Qumtor ken orny boıynsha qozǵalǵan qylmystyq is aıasynda tergeý júrip jatyr", - delingen habarlamada.

Buǵan deıin el bıligi Aqaevty 1992 jyly "Qumtor" jobasy boıynsha bas kelisimdi bekitý kezinde sybaılas jemqorlyqqa bardy dep aıyptap, resmı túrde izdeý jarıalaǵan.

Eks-prezıdent Asqar Aqaev Qyrǵyzstandy 1990-2005 jyldary aralyǵynda basqarǵan. 2005 jyly naýryz aıyndaǵy revolúsıadan keıin otbasymen birge Reseıge qashyp ketken.

Ótken jyly Aqaev kezindegi qatelikteri úshin Qyrǵyzstan halqynan keshirim suraǵan bolatyn. Tuńǵysh prezıdent Nursultan Nazarbaevpen qudalyq qatynasy bar Asqar Aqaev bıyl 10 qarashada 70-jasqa tolady.