Bilim jáne ǵylym mınıstri Asqat Aımaǵambetov aldaǵy oqý jylynda mektep formasyn kıý týraly suraqqa jaýap berdi. Bul týraly vedomstvo basshysy áleýmettik jelidegi paraqshasynda jazdy.

– Jańa oqý jylynyń bastalýy qarsańynda mektep formasy týraly másele ózekti bolady. Pandemıaǵa deıin mektep formasyn kıý mindetti boldy. Biraq ótken jyly barlyq jaǵdaılardy eskere otyryp, biz oqýshylarǵa mektepke tek mektep formasynda ǵana emes, sonymen qatar klasıkalyq stıldegi kıimde de kelýge múmkindik beretin sheshim qabyldadyq, – dedi ol.

Mınıstr bul norma bıyl da saqtalatynyn atap ótti.

– Men ózim ata-ana retinde de, bilim jáne ǵylym mınıstri retinde de mektep formasyn kıýdi qoldaımyn. Conymen qatar, pedagogter mektep formasy balalardy bir tártippen tárbıeleýge úles qosatynyn, sol mektepke baratyn balalarmen birlikti sezinýge múmkindik beretinin jáne eń bastysy, oqýshylar arasyndaǵy áleýmettik aıyrmashylyqty azaıtýǵa kómektesetinin aıtady. Ata-analardyń, muǵalimderdiń, mektep ákimshilikteriniń, bilim basqarmasy basshylarynyń pikirlerin tyńdap, kóbisi mektep formasyn jaqtaıdy degen qorytyndyǵa keldim.

Biraq mektep formasyn qoldaǵandar men qarsylyq bildirgenderdiń pikirlerin saralap, barlyq jaǵdaılardy eskere otyryp, biz oqýshylarǵa mektepke tek mektep formasynda ǵana emes, sonymen qatar klasıkalyq stıldegi kıimde de kelýge múmkindik beretin sheshimdi qabyldadyq. Bul sheshim tek ǵana kelesi oqý jyly úshin qabyldandy, – dep atap ótken Aımaǵambetov.