Tokıo olımpıadasynda bokstan Qazaqstan komandasynyń taǵy bir ókili Sáken Bıbosynov jartylaı fınalǵa shyqty. Bul týraly Olympic.kz saıty habarlady. 

"Shırek fınalda Sáken Bıbosynov ıspanıalyq Gabrıel Eskobarmen kezdesken. Óte tartysty ótken jekpe-jekte qazaqstandyq boksshy 3:2 esebimen jeńiske jetti. Birinshi raýndta Sákenniń joıqyn soqqysynan keıin qarsylasy nokdaýn aldy. 

Tóreshiler birinshi raýndtaǵy jeńisti Bıbosynovqa, ekinshi raýndtaǵy basymdyqty Eskobarǵa berdi. Al sheshýshi kezeńde qarsylasyna soqqylaryn dál tıgizgen Sáken Bıbosynov jeńiske jetti" delingen habarlamada. 

Osylaısha, Sáken olımpıada oıyndarynyń jartylaı fınalyna shyǵyp, kem degende qola júldegerler qataryna qosylyp otyr. 

Bıbosynov fınal joldamasy úshin talasta brıtanıalyq Djamal Iafaımen judyryqtasady.