Prezıdent Qasym-Jomart Toqaev İshki ister mınıstri Erlan Turǵymbaevty qabyldady. Ol memleket basshysyna eldegi qazirgi krımınogendik ahýal men ishki ister organdary jumysynyń nátıjeleri týraly aıtty. 

Mınıstrdiń málimetinshe, vedomstvo qylmystyń kóptegen túrlerin ashý kórsetkishterin jaqsartqan. Kisi óltirý, tonaý, buzaqylyq, urlyq, sondaı-aq, kámelettik jasqa tolmaǵandar jasaǵan quqyq buzýshylyqtar sany azaıǵan. Qoǵamdyq oryndar men kóshedegi qaýipsizdik deńgeıi joǵarylaǵan. Alaıda, ınternet jelisin paıdalaný arqyly jasalatyn alaıaqtyq qylmystar sany artqan. Buǵan pandemıa kezindegi onlaın-qyzmetterdiń ósýi yqpal etken.

Turǵymbaev prezıdentke vaksına alǵandyǵy jóninde jalǵan qujattar taratýdyń jolyn kesý boıynsha qabyldanyp jatqan sharalar týraly aıtty. Jyl basynan beri polısıa organdary 50-i jalǵan vaksınasıa pasporttaryn jáne 60-y jalǵan PTR-anyqtamalaryn jasaǵany úshin 110 qylmystyq is qozǵaǵan.

Kezdesý qorytyndysy boıynsha Qasym-Jomart Toqaev mınıstrlikke basqa memlekettik organdarmen birlesip, karantın sharalaryn qamtamasyz etýge erekshe kóńil bólýdi, sondaı-aq, kámeletke tolmaǵandarǵa qarsy qylmystardyń, turmys salasyndaǵy quqyq buzýshylyqtardyń aldyn alý jáne jol qaýipsizdigin qamtamasyz etý jónindegi jumysty jandandyrýdy tapsyrdy.