Mańǵystaý oblysy, Beıneý aýdanynda medısına qyzmetkerleriniń 100 paıyzy vaksına alǵan. Bul týraly Qoǵamdyq komýnıkasıa ortalyǵynda ótken brıfıńide Beıneý aýdanynyń ákimi Beıneýbek Ábilov málim etti.

Onyń aıtýynsha, aýdanda 10 egý pýnkti jumys isteıdi. Onyń ishinde 3 jyljymaly egý pýnkti bar.

«Beıneý aýdany oblys ortalyǵynan shalǵaı ornalasqandyqtan, aýdandaǵy vaksınasıa jumystary 1 aı keshigip bastaldy. Alǵashynda ekpeni tasymaldaý máselesi týyndady. Máselen, tońazytqysh jetispeýshiligi boldy. Osylaısha Beıneýde ekpe egý jumystary 26 naýryz kúni bastaldy. Vaksınanyń İ komponentin 7445 turǵyn alsa, İİ komponentpen 4656 adam egildi. Qazir Beıneý aýylynda 4, Sarǵa aýylynda 1, Aqjigit aýylynda 1 jáne Boranqul aýylynda 1 egý pýnktteri jumys istep tur», - dedi Beıneýbek Ábilov.

Aıta keteıik, Beıneý aýdanynda medısına qyzmetkerleriniń 100 paıyzy (aýdanda 600 medısına qyzmetkeri bar, barlyǵy ekpe aldy), bilim berý salasy qyzmetkerleriniń 60 paıyzy (aýdandaǵy 2664 qyzmetkerdiń 1694-i), memlekettik qyzmetkerlerdiń 92 paıyzy (aýdandaǵy 300 memlekettik qyzmetkerdiń 277-i) ekpe aldy.