Tokıo olımpıadasy kezinde Belarýs bıligin synap, eline qaıtýdan bas tartqan belarýs sportshysy Japonıadan ketti.

24 jastaǵy Krıstına Tımanovskaıa sársenbi kúni tańerteń Venaǵa ushatyn reıske otyrdy.

Belarýs sportshysyna Polsha memleketi gýmanıtarlyq vıza bergendikten, tikeleı Varshavaǵa barady dep kútilgen edi. Biraq sportshy sońǵy mınýtta baratyn jerin ózgertken.

– Tımanovskaıa Polsha dıplomatıalyq qyzmetteriniń qorǵaýynda. Biz birneshe ret aıtqanymyzdaı, qaýipsizdik maqsatynda ushý baǵytynyń egjeı -tegjeıin aıtpaımyz, –dedi Polsha syrtqy ister mınıstriniń orynbasary Marchın Prıdach.

Sportshy bul joly óziniń áreketi saıası narazylyq emes ekenin aıtty. Onyń sózinshe, belarýs sheneýnikteri olımpıadada qatelikter jibergen.

Sportshy jattyqtyrýshylaryn synǵa alǵanyn, sodan keıin májbúrli túrde áýejaıǵa aparylǵanyn aıtty.

Ol aldymen japon polısıasynyń qorǵaýyna boldy. Keıinirek Tokıodaǵy Polsha elshiligine jetkizildi.

Belarýs tarapy onyń emosıonaldy jaǵdaıyna baılanysty ulttyq quramadan shyǵarylǵanyn málimdedi.

Biraq Tımanovskaıa psıhıkalyq densaýlyǵynda eshqandaı kinárat joq ekenin aıtady.

Sportshy "saıası eshteńe aıtpaǵanyn" málimdedi. Belarýske óziniń qaýipsiz ekenin naqty bilgende ǵana qaıtpaq.