Belgili advokat jáne qazaqstandyq advokatýranyń negizin qalaýshylardyń biri –Aleksandr Rozensvaıg 66 jasynda dúnıeden ótti. Qaraly habardy Almaty qalalyq advokattar alqasy rastady.

"Novaıa gazeta" tilshisi Vácheslav Polovınko Facebook-tegi paraqshasynda Rozensvaıg koronavırýs ınfeksıasynan qaıtys bolǵanyn rastady.

"Búgin túnde Aleksandr Vladımırovıch Rozensvaıg eki-úsh kúndeı ystyǵy kóterilip, ókpeniń qatty zaqymdanýynan kóz jumdy. Bul – marqumnyń otbasy, dostary jáne qazaqstandyq advokatýra úshin úlken qaıǵy. Qosh bol, Aleksandr Vladımırovıch" delingen jýrnalıs jazbasynda.

Aleksandr Rozensvaıg Ál-Farabı atyndaǵy QazUÝ-dyń zań fakúltetin bitirgen. Ol 1987 jyldan bastap Almaty qalalyq jáne respýblıkalyq advokattar alqalarynyń, sondaı-aq Qazaqstannyń advokattar odaǵy tóralqasynyń múshesi bolǵan. Eńbek jolyn Almaty ishki ister basqarmasynyń tergeýshisi retinde bastaǵan.

Rozensvaıg "Advokattyq qyzmet týraly" Qazaqstan zańyn ázirleýge qatysqan. Ol belgili zańgerlerdiń tutas quramyn oqytyp, quqyqtyq máselelerdi talqylaýǵa úles qosqan.