Bilim jáne ǵylym mınıstrligi kolejderge qujat qabyldaý naýqany jalǵasyp jatqanyn habarlady. Búgingi tańda talapkerlerden 126 074 ótinish berilgen. 

Mınıstrliktiń málimetine súıensek, bıyl 97 myń bilim granty bólingen. Sonymen qatar tegin bilim alǵysy keletinder úshin kvotalyq sanattar tizimi keńeıtilgen. Kópbalaly otbasylardan shyqqan balalar úshin 5%, mártebesi keminde úsh jyl tolyq emes otbasylar qataryndaǵy balalarǵa 1%, múmkindigi shekteýli balalardy tárbıelep otyrǵan otbasylardan shyqqan balalar úshin 1% kvota qosylǵan. Eger de baldar teń bolǵan jaǵdaıda kvotalyq sanat jáne atestattyń ortasha baly eskeriledi.

Talapkerler kolejge qujattardy eki tásilmen elektrondyq úkimet portaly Egov.kz arqyly nemese tikeleı kolejge baryp tapsyrady.

Bolashaq stýdentter tórt mamandyq pen tórt kolejge deıin tańdaı alady. Qabyldaý rásimi jańa erejelerge sáıkes júzege asyrylady. Bıyl pedagogıkalyq, medısınalyq jáne shyǵarmashylyq mamandyqtardy qospaǵanda, qabyldaý emtıhandary bolmaıdy.

Esterińizge sala keteıik, memlekettik tapsyrys "aqsha stýdentpen birge júredi" qaǵıdaty boıynsha bólinetin bolady. Iaǵnı, eger buryn bilim basqarmalary granttardy kolejder arasynda bólgen bolsa, endi olar kolejder arasynda talapkerlerdiń tańdaýy boıynsha beriledi.

Konkýrs atestattaǵy mindetti jáne beıindik pánderden qoıylǵan baǵanyń ortasha baly boıynsha ótkiziledi.

– Baıqaý birneshe kezeńge bólingen. 29 shilde men 2 tamyz aralyǵynda – shyǵarmashylyq mamandyqtar, 16-19 tamyz aralyǵynda – pedagogıkalyq mamandyqtar boıynsha. 9-synyp negizinde oqýǵa túsetin talapkerler arasynda memlekettik tapsyrysty bólý 19-22 tamyz aralyǵynda, al 11 synyp túlekteri úshin 22-25 tamyz aralyǵynda ótedi. Memlekettik tapsyrys boıynsha oqýǵa qabyldaý týraly aqparat talapkerdiń jeke kabınetine keledi, – dedi BǴM Tehnıkalyq jáne kásiptik bilim departamenti dırektorynyń orynbasary Ernat Júnisov.

Eske sala keteıik, qujattardy qabyldaý 25 maýsymda bastalyp, 18 tamyzǵa deıin jalǵasady.