Sofá Berýlseva Tokıo olımpıadasyndaǵy jeńisti jolyn jalǵastyrýda. Ol úshinshi kezdesýden soń  merziminen buryn jartylaı fınalǵa shyqty dep habarlady Olympic.kz.

Áıelder arasynda 61 keliden joǵary salmaqta synǵa túsip jatqan ol ekinshi kezdesýinde Eýropa oıyndarynyń jeńimpazy, Italıa sportshysy Sılvıa Semerarony 5:1 esebimen utty. 

Keıin túrik sportshysymen teń túsip, úshinshi jekpe-jekte ázirbaıjadyq Irına Zareskaıadan 5:4 esebimen basym tústi. Osylaısha, 5 upaımen merziminen buryn jartylaı fınalǵa joldama aldy. 

Bul kem degende qola júlde qorjynda ekenin bildiredi. 

Sofá Berýlseva karateniń kýmıte sanaty boıynsha A tobynda baq synaýda. Toptyq kezeńde onyń qarsylastary Meltem Hodjaoglý (Túrkıa), Sılvıa Semeraro (Italıa), Irına Zareskaıa (Ázirbaıjan) jáne Aıýmı Ýekýsa (Iaponıa).

Toptyq kezeńde úzdik atanǵan eki sportshy jartylaı fınalǵa joldama alady.