Qarjy mınıstrligi Memlekettik kirister komıteti 30 qyrkúıekke deıin Qazaqstan aýmaǵynan qandaı kólikterdiń shyǵarylýy kerektigin málimdedi.

"Shetel azamattary óziniń turǵylyqty eline jáne kólikti áketetin elge qaıtarý úshin memlekettik shekaradan atalmysh kólikti minip óte alady. Eger ol múmkin bolmasa, tasymaldaýshylardyń qyzmetin paıdalana alady" delingen habarlamada.

Bul talap Eýrazıalyq ekonomıkalyq odaqqa múshe elderdiń memlekettik nómiri bar kólikterge qatysy joq.

– Qazaqstan azamattaryna Eýrazıalyq ekonomıkalyq odaq aýmaǵynda Belarýs Respýblıkasy men Reseı Federasıasynyń kólik quraldarymen ýaqytsha ákelý merzimderin esepke almastan júrýge bolady. Al Armenıa Respýblıkasy men Qyrǵyz Respýblıkasynyń kólik quraldarymen senimhat boıynsha basqarý quqyǵynsyz júre alady" delingen komıtet habarlamasynda.

Sheteldik kólik quraldaryn áketý týraly talap Eýrazıalyq ekonomıkalyq odaq elderiniń búkil aýmaǵyna qoldanylady. Iaǵnı, sheteldik kólik Eýrazıalyq ekonomıkalyq odaq aýmaǵynan tys aýmaqqa shyǵarylýy kerek.

Odaq aýmaǵyna úshinshi elderden ákelingen kólikti tıisti kedendik rásimdeýsiz bir jyl ǵana tebýǵa ruqsat berý týraly sheshimdi Eýrazıalyq ekonomıkalyq keńes 2020 jylǵy 29 sáýirde shyǵarǵan bolatyn.

Bul kezde pandemıa órship, shekaralardyń bári jabyq turǵandyqtan, merzim 2021 jyldyń 30 qyrkúıegine deıin uzartylǵan edi. Bul merzim bitkennen keıin Ákimshilik polısıa komıteti men Memlekettik kirister komıtetiniń qyzmetkerleri birlesip ýaqytsha júrý merzimi aıaqtalǵan kólikterdi izdeıdi. Ondaı kólikter tabylǵan jaǵdaıda aıyp turaǵyna qamalady.

"Eýrazıalyq ekonomıkalyq odaqtyń qoldanystaǵy zańnamasy boıynsha ýaqytsha ákelý merzimderi ótkennen keıin jeke tulǵada kedendik tólemderdi tóleý mindetteri týyndaıdy. Tólemniń mólsherin aýmaqtyq memlekettik kirister organdarynyń qyzmetkerleri esepteıdi" delingen habarlamada.