Búgin «Ekpe al da, páter utyp al» naýqanynyń jeńimpazy Qaırat Qosaevqa eki bólmeli páterdiń kilti tabystaldy, - dep habarlaıdy mangystaumedia.kz saıty.

Sonymen qatar naýqanǵa qatysyp, baǵaly syılyqtardy utyp alǵan qatysýshylarǵa syılyqtary berildi.

«İndet kúsheıip bara jatqan soń óz erkimmen vaksına aldym. Sodan soń osy naýqannyń uıymdastyrylyp jatqanyn estidim. Baǵymdy synap, qatysyp kórdim. Ótken jumada kútpegen jerden uıymdastyrýshy habarlasyp, páter utyp alǵanymdy aıtty. Qobaljydym. Qýandym. Buryn sońdy mundaı konkýrstarǵa senbeıtin edim. Biraq osy naýqan shynaıy eken», - deıdi Qaırat Qosaev.

Onyń aıtýynsha, vaksınany tek naýqan úshin ǵana emes, eń birinshi densaýlyǵy úshin alǵan. Osy rette ol turǵyndarǵa ekpe alyp, sol arqyly indettiń aldyn alý kerek ekenin aıtty.

Páter kiltin tabystaý sharasy ótkennen soń uıymdastyrýshylar men jeńimpaz 38 shaǵynaýdanda salynyp jatqan turǵyn úıge baryp, páterdiń qurylys jumystarymen tanysty.

Eske sala keteıik, naýqan bir jarym aıǵa deıin sozyldy. 40-qa jýyq adam baǵaly syılyqtardyń ıesi atandy.