Qytaı Halyq Respýblıkasymen júrgizilgen kelissózderdiń qorytyndysy boıynsha koronavırýsqa qarsy Sinopharm vaksınasynyń birinshi partıasy, Almaty "SK-Farmasıa" qoımalaryna jetkizildi. Bul týraly densaýlyq saqtaý mınıstrligi habarlady. 

Densaýlyq saqtaý mınıstrliginiń tapsyrmasy boıynsha, Beıjiń bıologıalyq ónimder ınstıtýty ázirlegen Sinopharm vaksınasynyń 4 mln dozasy satyp alyndy. 

Qytaı vaksınasynyń birinshi partıasy 1 mln dozadan turady. Ol elde besinshi vaksına bolyp tirkeldi. Sinopharm preparaty qazaqstandyqtarǵa koronavırýs ınfeksıasyna qarsy vaksınasıalaý úshin qoldanylady. 

Sinopharm DDU-men qaýipsiz jáne tıimdi dep jiktelgen alǵashqy qytaı preparaty, 45 elde eresekterge vaksınasıalaýǵa ruqsat etilgen. Búgingi tańda Qytaıdan basqa, vaksına BAÁ men Serbıada óndirýge maquldanǵan.