Bilim jáne ǵylym mınıstri Asqat Aımaǵambetov jańa oqý jylyn dástúrli formatta uıymdastyrýdy  josparlap otyrǵanyn málimdedi. Bul týraly ol úkimettiń keńeıtilgen otyrysynda aıtty.

– Oqýshylardy, sonymen qatar kolejder men joǵary oqý oryndarynyń stýdentterin qatań sanıtarlyq talaptardy saqtaı otyryp, dástúrli formatta oqytylady. Balabaqshalarda 20-25 baladan aspaıtyn toptarǵa shtattyq rejımde jumys isteý usynylady, – dedi mınıstr. 

Sondaı-aq bilim berý uıymdarynda kúndelikti termometrıa, jeldetý, kvarsteý, dezınfeksıa sharalary ótkiziledi.

– 1-qyrkúıekte bolatyn Bilim kúni saltanatty is-shara  dástúrli formatta, mektep aýmaǵynda 1-synyp oqýshylary úshin uıymdastyrylady. Olarǵa saltanatty túrde alǵashqy oqýlyq "Álippe" tabystalady. Al, 2 men 11 synyp oqýshylary tikeleı bekitilgen kabınetterge baryp, taqyryptyq synyp saǵattaryna qatysady.

Jańa oqý jylynda mektep formasy boıynsha talaptar negizinen saqtalady. Biraq pandemıa jaǵdaılaryna baılanysty mektepke klasıkalyq stıldegi yńǵaıly kıimmen kelýge ruqsat etiledi, – dep aıtty bilim mınıstri. 

Sondaı-aq buqaralyq is-sharalarǵa tyıym salynady. Stýdentter, pedagogter men basqa da qyzmetkerler ǵımaratqa "Ashyq" júıesi arqyly kirgiziledi.