Almatydaǵy Naýryzbaı aýdany "Shuǵyla Sity" (340/4) yqshamaýdanyndaǵy kópqabatty úılerdiń birinde  órt shyqty. "Qamshy" redaksıasyna habarlasyp, kómek suraǵan turǵyndar jańa salynǵan kópqabatty úıdiń birqatar olqylyqtaryna ákimdik nazar aýdarmaı otyrǵanyn jetkizdi.

Oqys oqıǵa 13 tamyz kúni bolǵan.  Kýágerler órttiń shyǵýynyń birneshe sebebi bar dep sanaıdy. Aıtýlarynsha, kópqabatty úılerde gaz balondy qoldaný, elektr toqtarynyń aýyrlyǵy, páterlerdiń gazben qamtamasyz etilmeýi oqys jaǵdaı sebebi bolýy yqtımal.

Qamshy redaksıasyna shaǵymdanǵan turǵyndar kópqabatty úıdiń ózge de birqatar problemalaryn aıtty.

– Naýryz aıynan bastap kóppáterli úıdi paıdalanýǵa berdi. Sol aıdan bastap keldik. Biraq biz úıge kirgende jóndeý jumystary áli aıaqtalmaǵan edi. Tek jaryq pen sý ǵana qosylǵan. Gaz atymen joq. Mamyr aıynyń aıaǵyna deıin bitirip berýge ýáde etken. Alaıda arada 6 aı ótti. Eshteńe jasalmady. Birde jóndeý jumystary júrgiziledi dep 20 kún ystyq sýdy óshirgen. Keıin 25 kún degende áreń qosty. Onyń ózinde sý sap-sary, taza emes, – deıdi narazy turǵyndar.  

Nysan qurylysyn júrgizgen "TIMÝS-Construction" kompanıasyna Turǵynúı qurylys jınaq banki arqyly baspanaly bolǵan 660-qa jýyq adamnyń da aıtary bar.

– Bizge konkýrstan ótkennen keıin páterlerdi kórsetýi kerek bolǵan. Biraq kompanıa kórsetpeı, mańaıyna jolatpaı qoıdy. Endi bul problemalardy ákimdik merdiger uıymǵa, merdiger uıym ákimdikke silteıdi. Báribir ákimdik tarapynan jaýap bolý kerek, – deıdi aýdan turǵyndary.