Almaty qalasynda jalǵan PSR nátıjesin satqan stýdent ustaldy, dep habarlady Polisia.kz. 

Jedel-izdestirý sharalary nátıjesinde jeke medısınalyq ortalyqtyń egý bólmesinde medısınalyq qyzmetker bolyp jumys isteıtin 25 jastaǵy H. esimdi medısına ýnıversıtetiniń stýdenti ustaldy.

Kúdikti óz qyzmetin 20 myń teńgege baǵalaǵan. Atalǵan oqıǵaǵa baılanysty qylmystyq kodekstiń 385-baby 1-tarmaǵy (Jalǵan qujattardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý) boıynsha tergeý júrýde. 

– Kúdikti tek bir ret jalǵan PSR nátıjesin jasaǵanyn moıyndap otyr. Tergeý barysynda onyń qansha adamǵa jalǵan qujat daıyndap bergenin anyqtaıtyn bolamyz, – dedi qalalyq polısıa departamenti krımınaldyq polısıa basqarmasynyń bastyǵy Qýatbek Naýatov.