Aýyl sharýashylyǵy mınıstrligi janyndaǵy Almaty qalasy boıynsha karantındi, ósimdikterdi qorǵaý jáne fıtosanıtarıalyq baqylaý beketterin memlekettik qadaǵalaý bóliminiń K. esimdi eks-basshysy sottaldy. Bul týraly Almaty qalasy Medeý aýdany №2 aýdandyq sotynyń baspasóz qyzmeti habarlady.

"2021 jyldyń aqpan aıynda quqyqtyq statısıka jáne arnaıy esepke alý salasyndaǵy ýákiletti organda tirkeýsiz saýda naryqtarynda baqylaý men qadaǵalaýdy júzege asyrýǵa ýákilettik berilgen K., aldyn ala ázirlengen qylmystyq josparǵa sáıkes, jeke, óziniń qyzmettik jaǵdaıyn paıdalana otyryp, satýshylardy satyp jatqan karantınge jatqyzylǵan ónimderge fıtosanıtarıalyq sertıfıkattar men basqa da qajetti qujattar joqtyǵyna baılanysty Qazaqstan Respýblıkasynyń ÁQBtK-niń 400-baby boıynsha ákimshilik jaýapkershilikke tartylady, aıyppul salynady dep qorqytqan. Sodan keıin satýshylar oǵan táýeldi bolyp, tyǵyryqqa tirelgendikten ákimshilik jaýapkershilikten bosatý úshin oǵan erikti túrde para retinde aqshalaı qarajat, ónimder jáne ónimderge jeńildik bergen. Osylaısha, K. jalpy somasy 157 580 teńge para alǵan" delingen sot taratqan aqparattyq habarlamada.

Sottalýshy sot májilisinde óz kinásin moıyndamaǵan. Alaıda onyń kinási sotta zerttelgen dáleldemelerdiń jıyntyǵymen rastalyp, sot aıyptalýshyny 7 jylǵa bas bostandyǵyn aıyrý týraly úkim shyǵardy. Aıyptalýshy jazasyn qylmystyq-atqarý júıesiniń ortasha qaýipsiz mekemesinde ótemek. Sondaı-aq ol memlekettik laýazymdy atqarý quqyǵynan ómir boıyna aıyryldy.

Sot úkimi ázirge zańdy kúshine engen joq.