"Bilim jáne ǵylym – eldiń turaqty damýynyń kepili" pedagogterdiń respýblıkalyq tamyz konferensıasynda bilim jáne ǵylym mınıstri Asqat Aımaǵambetov bıylǵy oqý jylyna qatysty málimdeme jasady.

– Pedagogıkalyq mamandyqqa túsýdi yntalandyrý úshin bolashaq pedagogterge stıpendıa mólsheri de artty. Aldyńǵy jyldan bastap, bıyl da eń joǵary stıpendıa pedagog mamandyqtarynda oqyp jatqan stýdentterdiki, ıaǵnı 42 myń teńge, – dep atap ótti ol.

Mınıstr dástúrli formatta oqý pedagog pen oqýshy úshin nátıjeli jumys ekenin atap ótti.

– Úlgerimi tómen oqýshylardyń bilim deńgeıin qalyptastyrýǵa baǵyttalǵan is-sharalar basty nazarda bolýǵa tıis. Negizgi dástúrli format saqtalatyn bolady. Oqýshy men pedagogtyń betpe-bet jumys isteýi nátıjeli format ekeni aıqyn. Sondyqtan osy jumysty uıymdastyramyz, – dedi ol.

Sondaı-aq ol jańa oqý jylynda "Álippe" men "Ana tili", "Býkvar" jáne "Obýchenıe gramote" oqýlyqtary 1-synyp baǵdarlamasyna qaıta engizilgenin aıtty.

– 1 qyrkúıekte ótetin saltanatty is-sharada mektep tabaldyryǵyn alǵash attap otyrǵan balapandarymyzǵa "Álippe" kitaby saltanatty túrde beriletin bolady. Oqýlyq ult ustazy A. Baıtursynulynyń ádistemesi negizinde jasaldy. Bizdiń ádiskerlerimiz, ǵalymdarymyz úlken jumys istedi, – dedi Aımaǵambetov.