Atyraýdaǵy psıho-nevrologıalyq aýytqýlary bar balalarǵa arnalǵan mektep-ınternattaǵy balalarǵa qarsy jazalǵan ozbyrlyq áreket boıynsha tergeý bastaldy. Bul týraly KTK arnasy habarlady.

Dimkás (múgedek – red) balalarǵa jasalǵan ozbyrlyqty Atyraýdaǵy psıho-nevrologıa aýytqýlar ortalyǵynyń burynǵy qyzmetkeri vıdeoǵa túsirgen. Onyń aıtýynsha, №3 arnaýly áleýmettik ortalyqtaǵy soraqylyq munymen bitpeıdi. 

Bul beınejazba áleýmettik jelide 2-3 kúnnen beri qyzý talqylanǵanymen, 8-shi sáýirde túsirilgen. Vıdeonyń avtory – Ulbıke Beısekenova. Ózi ortalyqta bir jylǵa jýyq istegen eken. Ol "osy aralyqta mundaı soraqylyqtyń talaıyna kýá boldym" dep otyr. Sondaı-aq burynǵy áriptesterin balalarǵa bólingen aqshany urlady dep aıyptaıdy.

Vıdeodan ýnıtazdyń eki búıirindegi eki temirge 2 balany tas qylyp baılap qoıǵanyn kórýge bolady. Alaıda bul áreketti kim jasaǵany ázirge belgisiz. Dál sol kúni kezekshilikte bolǵan eki tárbıeshi koronavırýs juqtyryp, qazir em qabyldap jatyr.

Polısıa departamenti ǵımarattyń ishindegi beınekameranyń barlyǵyn tekserip, tergeý amaldaryn bastap ketken. Internat basshysy muny vıdeo avtory Ulbıke Beısekenovanyń jasaǵan qastandyǵy deıdi. Aıtýynsha, ol osy jerde qyzmette júrgende ortalyqqa tıesili talaı múlikti jymqyrǵan.

Ol jumystan qýylyp, amaly taýsylǵan soń beınejazbadaǵy áreketterdi ózi uıymdastyrýy múmkin dep kúdikke ilinip otyr. Oqıǵa bolǵan kúni kezekshilik qyzmetti atqarǵan 2 tárbıeshi qazir polısıanyń qadaǵalaýynda. Dertinen aıyǵyp shyqqan soń tergeýge alynyp, derek boıynsha is qozǵalmaq.