Jaqynda Ó.A.Joldasbekov atyndaǵy Stýdentter saraıynda «Husnıhat» ádebıetti qoldaý qorynyń uıymdastyrýymen Respýblıkamyzda tuńǵysh ret «Bir óleń, bir áýen» atty án-jyr keshi ótti. Bul týraly «Qamshy» portaly habarlaıdy.

Uly Abaıdyń týǵanyna 170 tolýyna oraı, qazaq poezıasyn nasıhattaý maqsatynda ótkizilgen rýhanı keshke Qazaqstan Jazýshylary odaǵynyń tóraǵasy Nurlan Orazalın bastaǵan qazaq poezıasynyń búgingi ókilderi qatysty. Ádebıet aıdynyndaǵy aǵa býyn sanalatyn Iran-Ǵaıyp, Shómishbaı Sarıev, Júrsin Erman, Járken Bódesh, Israıl Saparbaı, Ulyqbek Esdáýlet, Qasymhan Begmanov, Ǵalym Jaılybaı, Baıan Beketova, Ádilǵazy Qaıyrbekov, Baýyrjan Jaqyp, Ǵalym Qalıbekuly, Maraltaı Raıymbekuly, Serik Qalıev, Janarbek Áshimjan qatarly tanymal aqyndar óleń oqyp, qazaq estradasynyń ónerpazdary Baǵdat Sámedınova, Zattybek Kópbosynuly, Gúlnur Ómirbaeva, Roza Álqoja, «Qaragóz» ansambli, Jaqsybek Qalelbekuly t.b óner juldyzdary qatysty.

Kaztrans kompanıasynyń demeýshligimen, «Husnıhat» ádebıetti qoldaý qory uıymdastyrǵan «Bir óleń, bir áýen» keshi barysynda arnaıy daıyndalǵan «Abaı» syılyǵy «Alash» halyqaralyq ádebı syılyǵynyń ıegeri, aqyn Ǵalym Jaılybaıǵa tabys etildi. M.Áýezov atyndaǵy Ádebıet jáne óner ınstıtýtynyń dırektory, jazýshy Ýálıhan Qalıjanov «Abaı» esimi jazylǵan arnaıy tósbelgini aqynnyń keýdesine taqty. Qazaq qalamgerleriniń ishinen top jarǵan Ǵalym aqyn: «Men úshin ómirimdegi eń úlken syılyq – Abaı syılyǵy» dep aǵynan aqtaryldy.

Bul syılyq sonymen qatar, Abaıdyń óleńderi men qara sózderin, Muhtar Áýezovtiń shyǵarmalaryn qytaı tiline aýdarǵan, QHR tanymal qalamgeri, abaıtanýshy, Sibe ultynyń jazýshysy Qabaıǵa(Ha Hýanchjan) da tabys etildi.

Bul konsert aty aıtyp otyrǵandaı án men jyrdan shashý shashyp, kórermen kóńilin tapqan ádemi kesh boldy. «Qamshy» portaly qazaq ádebıetine súbeli eńbek sińirip júrgen qos qalamgerdi shyn júrekten quttyqtaıdy!

 Nurzat Toǵjan