Bilim jáne ǵylym mınıstri Asqat Aımaǵambetov orta bilim berý uıymdary basshylaryn qoldaý, qyzmetke taǵaıyndaý tártibi, biliktilikti arttyrý júıesi boıynsha atqarylyp jatqan jumystar týraly aıtyp berdi.
Mınıstr alǵash ret bilim berý uıymdarynyń basshylary men olardyń orynbasarlaryna atestattaý jáne biliktilik sanatyn berý júıesi engizilip jatqanyn, atestattaý úsh jylda bir ret ótkizilip, eki kezeńnen turatynyn aıtty.
"Birinshi kezeńde zańnama boıynsha bilimin tekserýge arnalǵan jáne basqarýshylyq quzyretteri boıynsha test tapsyrady. Ekinshi kezeńde bilim berý uıymdarynyń basshylary belgili bir ýaqyttaǵy atqarǵan jumysynyń tıimdiligi baǵalanady. Oqý meńgerýshileri úshin atestattaý testileýsiz tek bir kezeńnen turatynyn atap ótkim keledi. Atestattaý nátıjeleri boıynsha komısıa atqaratyn laýazymyna sáıkestigi/sáıkes emestigi týraly jáne úsh sanattyń bireýin berý týraly sheshim qabyldaıdy. Iaǵnı, laýazymyna sáıkestigi belgili bolsa, dırektorǵa sanat beriledi. Kerisinshe, laýazymǵa sáıkes emes bolsa, dırektor jumystan bosatylýy múmkin. Berilgen sanatqa baılanysty dırektor nemese oqý isiniń meńgerýshisi sanat úshin laýazymdyq jalaqydan 30%, 70%, 100% mólsherinde qosymsha aqy alatyn bolady. Sonymen qatar mektep dırektory men onyń orynbasarlarynyń laýazymdyq jalaqysy jyl saıyn 25%-ǵa artady" dep jazdy mınıstr facebook paraqshasynda.
Aımaǵambetov bul sharalar mektep basshylyǵynyń jalaqysyn muǵalimderdiń ortasha jalaqysynyń deńgeıine jaqyndatýǵa múmkindik bergenimen, bul – mektep basshysy laýazymyna eń myqty mamandardy tartý úshin jetkiliksiz ekenin atap ótti.
"Basshylarǵa eńbekaqy tóleý júıesinde buryn-sońdy yntalandyrýshy faktorlar bolǵan joq. Kóshbasshynyń jalaqysy onyń tıimdi nemese tıimsiz bolýyna baılanyssyz birdeı bolatyn. Sonymen qatar mektepte 80 bala oqıtyn bilim ordasynyń dırektory men 1200 bala bilim alatyn mektep dırektory birdeı jalaqy alady. Qazir biz atestattaýdy jáne jumys tıimdiligi úshin qosymsha aqy tóleý júıesin engizip jatyrmyz. Sondaı-aq mekteptiń jobalyq qýattylyǵyna baılanysty laýazymdyq jalaqyny dıfferensıalaýdy engizý josparda bar. Sondyqtan aldaǵy ýaqytta da biz mektepterdi eń myqty pedagogterdiń basqarýy úshin sharalar usynatyn bolamyz" dedi mınıstr.
