"Reseı, Iran jáne Qytaı 2021 jyldyń aıaǵynda nemese 2022 jyldyń basynda Parsy shyǵanaǵynda birlesken teńiz jattyǵýlaryn ótkizedi" dep habarlady Reseıdiń Tegerandaǵy elshisi Levan Djagarán.

"Úsh eldiń teńiz kemeleri qatysatyn jattyǵýlar keme qaýipsizdigi men qaraqshylyqpen kúresýge baǵyttalady" dep málimdedi elshi.

Djagaránnyń aıtýynsha, BUU-nyń Iranǵa jasaǵan qarý-jaraq embargosy joıylǵannan keıin Máskeý men Tegeran áskerı ónimderdiń barlyq assortımenti boıynsha konstrýktıvti dıalog júrgizýdi josparlap otyr.

"Bizdiń Iranmen qorǵanys salasyndaǵy yntymaqtastyǵymyzdyń 50 jyldan astam tarıhy bar. Yntymaqtastyǵymyz Reseıdiń qarý-jaraq saýdasy salasyndaǵy halyqaralyq mindettemelerin qatań saqtaı otyryp, ózara tıimdi negizde damyp keledi. Shekteýlerdiń joıylǵanyn eskere otyryp, reseılik tarap áskerı ónimniń barlyq assortımenti boıynsha ırandyq seriktestermen konstrýktıvti dıalog júrgizedi" dedi Djagarán.