Jaqynda Qyzylorda oblysynyń ákimi Qyrymbek Kósherbaev Qorqyt ata atyndaǵy Qyzylorda memlekettik ýnıversıtetinde stýdentterge «Halyqaralyq valúta júıesiniń qalyptasýy men damýy» taqyrybynda dáris oqyǵan. Onda ákim myrza «Táýelsizdikti bárinen de bıik qoıatyn biz úshin tól teńgeden bas tartý múmkin emes qadam» degen. Bul týraly «Qamshy» portaly nur.kz saıtyna silteme jasaı otyryp habarlaıdy.

Qyzylorda oblysynyń ákimi, saıasat ǵylymdarynyń doktory Qyrymbek Eleýuly Kósherbaev myrza stýdentterdiń aldynda oqyǵan dárisinde jahandyq saıasattaǵy oryn alyp jatqan oqıǵalardy saraptaı kele, halyqaralyq valútanyń elimizdiń ekonomıkasyna áserine keńinen toqtalǵan.

«Álemdik valúta júıesiniń qazirgi jaǵdaıy men onyń bolashaǵy dúnıe júzinde eń qyzý talqylanyp jatqan máselelerdiń biri. Kóp mamandardyń pikirinshe, aldaǵy ýaqytta valúta júıesi túbegeıli túrde ózgerýi múmkin. Basty qaǵıdalary men erejeleri XX ǵasyrdyń ortasynda qalyptasqan jáne AQSH dollaryna negizdelgen qazirgi álemdik valúta júıesi osy kúngi álem ekonomıkasyndaǵy kúshterdiń ara-salmaǵyn eskermeıdi», – dedi Kósherbaev.

«Álem ekonomıkasynyń tarıhyna kóz salsaq, quldyraý, órleý bolyp otyrǵan. Sondyqtan bul qıynshylyq ta ótpeli kezeń. Táýelsizdiktiń bastaýynda Qazaqstannyń qysqa ýaqytta osyndaı jetistikterge jetýi, Astananyń qazirgideı qalaǵa aınalýy bizge múmkin emes bolyp kóringen. Teńgeniń de álemdik valútalar qatarynan oryn alýy qazir múmkin emes bolyp kórinedi. Biraq, armany asqaq, muraty bıik elder ǵana alǵa basady. Sol armandarymyzdy aqıqatqa aınaldyrar azamattardyń osy zalda otyrǵanyna men senemin», – dedi oblys ákimi.

 Nurzat Toǵjan