Ulttyq qaýipsizdik komıteti Atyraý jáne Batys Qazaqstan oblystarynyń aýmaǵynda quramynda esirtki bar ósimdikter ósirýdi uıymdastyrǵan qylmystyq toptyń zańǵa qaıshy áreketiniń jolyn keskenin habarlady.

"Arnaıy operasıa nátıjesinde 2021 jylǵy 18 tamyzda úsh plantasıada 31 adam (onyń 17-si sheteldik), onyń ishinde esirtki tobyn uıymdastyrýshy ustaldy. Zańsyz aınalymnan 4 tonnadan astam marıhýana, 7 birlik atys qarýy men oq-dáriler tárkilendi. Sonymen qatar tintý barysynda brakonerlik jolmen alynǵan aqbóken múıizderi men bekire tuqymdas balyqtar tabyldy" delingen aqparattyq habarlamada.

Fıgýranttardyń esirtki qylmysyna qatystylyǵyna bultartpas dáleldemelerge qol jetkizilgen. Qylmystyq toptyń qurylymy jáne qatysýshylar arasynda rólderdi bólýi anyqtalǵan.