Jambyl oblysy Baızaq aýdanyndaǵy áskerı qoımada bolǵan jarylystan zardap shekkender sany 32 adamǵa jetti. Bul týraly oblys ákimdiginiń baspasóz qyzmeti habarlady.

Osy nysannyń janynda Baızaq aýdanynyń Úshbulaq (120 turǵyn), Jibek joly (500 turǵyn), Qaınar (85 turǵyn) eldi mekenderi ornalasqan, olar qazirgi ýaqytta evakýasıalanǵan.

Órtti sóndirý úshin TJD-niń 12 tehnıkasy men 42 qyzmetkeri, sondaı-aq áskerı bólimnen 8 qyzmetker men 2 tehnıka jumyldyrylǵan.

Prezıdent Qasym-Jomart Toqaev Twitter-degi paraqshasynda Qorǵanys, tótenshe jaǵdaılar mınıstrleri, ishki ister mınıstriniń orynbasary Jambyl oblysyna ushyp ketkenin habarlady.

– Jaqyn mańdaǵy aýyldardyń turǵyndaryn kóshirý týraly sheshim qabyldandy. Oblystyq tótenshe jaǵdaılar departamentiniń 30-ǵa jýyq qyzmetkeri men áskerı qyzmetshiler jaraqat aldy, – dep jazdy Toqaev.

Oqıǵa ornyna mınıstrdiń orynbasary general-leıtenant Rýslan Shpekbaevtyń basshylyǵymen Qorǵanys mınıstrliginiń komısıasy jiberilgen.

Órtti tolyq joıý boıynsha jedel shtab jumys istep jatyr. Qylmystyq is qozǵaldy. TJM, İİM bólimsheleri jumyldyryldy. Temirjol qatynasy ýaqytsha toqtatyldy.

Búgin shamamen 19.00-de Jambyl oblysy Baızaq aýdanynda ornalasqan áskerı bólimde qoımalardyń biriniń janynda órt shyǵyp, sonyń saldarynan belgisiz zattar jarylǵan. Áleýmettik jelide snarádtar jarylyp jatqan vıdeolar taralýda. Taraz qalasy turǵyndarynyń aıtýynsha, jarylys daýsy áli de istilip jatyr.